巴利巴「有買貴無買錯」
更新時間：03:00 2025-08-16 HKT
發佈時間：03:00 2025-08-16 HKT
發佈時間：03:00 2025-08-16 HKT
字體大小
曼聯買完些斯高後，仲有望簽入白禮頓中場巴利巴。「莫財」的紅魔點解可以接近完成4宗高價收購，如果要從財技角度去講要花很長的篇幅，簡單一點來說，就是球隊提早消費未來幾年的預算，如果今夏的引援未能改變成績和困局，到時真係萬劫不復。
目前要問，係有無需要，同使唔使咁貴？從球隊今夏的熱身賽所見，文路爾烏加迪似乎並非高級貨，去季他受傷患困擾，但現時已完全康復，場上見到他墜後接應時，總未能找到最好的傳球選擇，好多時一要傳左路，佢就向右；要佢向前，佢就拖慢，中場向前推進能力不足。同時對抗又麻麻，向前逼搶又唔夠果斷，攻守兩端的作用平平無奇。
季初坐穩中場主力位置
巴利巴呢？佢上季在白禮頓完全開竅，季初不久就立即坐穩中場主力位置。而且佢身體對抗非常出眾，最出色係向前逼搶的時機和選擇，經常在前場斷球令球隊可以立即再發動攻勢。體力充沛，覆蓋範圍大係佢另一特點，只是技術還有點粗糙，要多些少時間琢磨。
買的確有需要，下一個問題係值唔值咁貴。白禮頓近年甚少「昆」人，摩西斯卡些度係貴，但歐協聯、世冠盃已證明花得值；比蘇馬、祖奧柏度、阿歷斯麥阿里士打，甚至乎羅拔山齊士都對得起身價。根據往績，巴利巴只係有買貴，無買錯﹗
