193 缺席《造星總決賽》與經理人爆內訌
發佈時間：03:00 2026-01-07 HKT
MakerVille旗下歌手日前在澳門演出跨年倒數騷，ERROR全晚甚少出場更只唱兩首半歌，成員193（郭嘉駿）剛推出新歌，卻沒有solo演出，有指他嬲爆，並臨時缺席《全民造星VI總決賽》，由隊友保錡頂上，並爆出內訌。
日前在澳門舉行的《全民造星Family跨年倒數》，ERROR全晚甚少出場更只唱兩首半歌，成員193（郭嘉駿）推出新歌《你的名字 我的聖詩》也沒solo環節，有指他不滿嬲爆在社交網留言「問吓監製」、「監製好似唔聽意見」，日前更缺席《全民造星VI總決賽》，由隊友保錡代替193做客席司儀，當晚保錡訪問評判被嘲英文差，並用「港式英文」，經理人濟哥挺身護保錡，疑暗示臨行前兩日才通知頂上，疑引發ERROR及粉絲之間內訌。
ERROR的何啟華（阿Dee）和保錡在《全民造星VI總決賽》負責訪問評判團，有傳是因193以私人理由突然缺席，由保錡頂替，惟保錡以「港式英文」訪問韓星少女時代成員孝淵，被網民批「拉低水準」，ERROR經理人濟哥前晚在社交網發文解畫，指保錡是臨時幫手頂檔：「得兩日，就係仲要今日（1月5日）有工作，知道要幫手我同佢（保錡）講都即刻肯嚟頂。仲要佢早一日嚟咗，production（製作組）叫佢幫手排一排，佢都即刻過嚟排同夾下稿。」
稱經理人說話不可盡信
濟哥所言疑引發ERROR及粉絲內訌，敢言的193即發文：「其他嘢我唔方便評論，亦都唔覺得需要評論，正如我都唔覺得經理人應該亂發言一樣，不過你好似有啲誤會，以正視聽所以我都要講一講，首先係請大家千祈唔好盡信我經理人講嘅嘢；二，唔知你點樣聽返嚟係兩日？我肯定就最少有六日；又點解係無暇出席？邊個講㗎？同埋其實係可以唔需要人頂替嘅。」
對此，濟哥亦留言澄清「我講清楚係，我冇話193兩日前通知呀，係話兩日前叫保錡頂咋」、「明白，解決清楚係6日通知，都要同公司內部溝通，所以兩日前先通知保錡幫手做，係大家誤會咗個情況」。
