Jer罕有嬲爆 轟網民﹕全民designer?
發佈時間：03:00 2025-09-12 HKT
MIRROR唱功擔當柳應廷（Jer）在社交網宣布將於11月30日及12月1日登亞博，舉行兩場個唱《Jer Lau“The Shape of Breathing”Live 2025》，演唱會海報一曝光，卻有網民表示被海報設計「嚇一嚇」，紛紛批評設計團隊水準大倒退，狂收劣評令Jer嬲得發文反擊，問是否「全民designer」，網民則一夜開Talk炒熱話題「全民designer」繼續寸Jer。
事緣Jer公開亞博演唱會海報，遭網民批評海報「退地」粗劣似小學生質素，亦懷疑是P圖甚至是靠AI，有網民更寸爆Jer的公司MakerVille轉用初中生做設計。Jer卻「唔Buy」網民一套，即在限時動態火滾發文：「真心嬲左（咗），呢個世代真係全民designer？em…想講張相淨係較左（咗）顏色，用左（咗）Filter，同較唔同地方既（嘅）陰影位。冇大家所指既（嘅）小學生退地，p圖同ai。」
他更叫網民想一想作品背後有很多人的心血：「講野（嘢）前可以諗下（吓）背後concept，整piece/背後嘅人，付出既左（咗）幾多時間同心機 btw你地（哋）所見呢一張出街嘅相，淨係調整都整左（咗）30幾個version」。
粉絲留言打氣力撐
雖然Jer開腔力撐團隊，但網民就針對Jer一句「全民designer」展開話題熱議，有網民反問「成日都話用好多心機，用得心機多就一定唔可以批評，咩道理？」亦有做設計的網民寸Jer所講「30幾個version」即是做得差，「明白點解要改3x次，咪就係因為做得唔好先需要改咁多次囉。」雖然大批網民加把口寸爆Jer的嬲爆反擊發文，但亦有不少粉絲留言撐Jer，為他打氣。
此外，MIRROR「FING小組」成員Alton、AK、Frankie、Lokman也宣布將於11月5日假亞博10號展館舉行《Manifest | W.T.F.2 Live 2025》，是四子繼6月舉行《Manifest | W.T.F. Live》後，相隔數月即舉行Part 2。
