梁敏巧獲暖男律師力追 直言「認真了解中」
發佈時間：03:00 2025-08-27 HKT
「東張女神」梁敏巧被今期《東周刊》獨家爆約會《女神配對計劃》節目中的求愛勇者「暖男律師」Matt（劉啟進），直擊到二人情侶裝甜蜜撐枱腳又睇演唱會，期間男方更情不自禁搭女神肩膊，被指配對成功。昨日梁敏巧以短訊回覆《星島頭條》，表示對方主動出擊約會，二人認真了解中，也直言有其他男士向她展開追求，她堅信自己值得被愛，亦鼓勵女孩子們要愛自己。
梁敏巧對於被《東周刊》直擊到甜蜜約會，問是否已開始拍拖？她表示：「我們未拍拖呀，了解中。」並指約會是Matt主動出擊，直指他比節目主動很多，又指私下相處感覺沒太大不同，「他主動約我睇演唱會同食飯，同我節目認識嘅佢差唔多，但再放鬆、大膽同主動啲。」至於和Matt有否機會再進一步？梁敏巧坦言：「佢係幾好嘅，但我揀人時，人都係揀緊我㗎嘛，我哋講到明都唔會急，認真了解雙方，慢慢嚟啦。」
仍有其他男士追求
談到拍到Matt表現親暱搭膊頭，是否不介意與追求者有身體接觸？梁敏巧笑說不是搭膊頭，「佢見到我件恤衫跌膊，佢幫我整好咋，我自己都係幫自己整番好件衫咋，之後無身體接觸啦，佢純粹出於風度同細心。」
此外，梁敏巧透露節目主持林盛斌（Bob）和其他「女神」都知Matt對她展開追求，「Bob爸爸同姊妹們私底下都有同我講，隔離睇到我哋相處係幾舒服同自然，苦口婆心咁叫我認真考慮，尤其Bob爸爸，佢真係無得頂，佢無得益㗎！但佢真係好認真咁同我分析，金牌媒人同爸爸呢個名佢絕對孭得起有餘！」但她直言除了Matt之外，也有其他男士展開追求，亦開心有很多人關心她的感情事，「到依家仍然有網民會攻擊我外表同內在，呢啲亦係好多女孩子會面對嘅問題，但女仔們要相信自己嘅價值啊！開頭好多網民都唔睇好我，但我堅信自己值得被人愛護，我亦好幸運有人真誠地對待我。所以，女孩子們，要愛自己！每個人都有自己市場。」
