許志安Sammi合體慶生 手黐手冧爆切蛋糕
發佈時間：03:00 2025-08-13 HKT
BIG FOUR演唱會前晚於紅館圓滿結束，昨日58歲生日的許志安，前晚獲大會驚喜慶生，全場為安仔大唱生日歌令他難忘，不過他坦言最想同太太鄭秀文（Sammi）靜靜過生日，同是8月壽星的Sammi在慶功宴孖安仔合體慶生，兩公婆手黐手甜爆切蛋糕。
BIG FOUR紅館演唱會前晚舉行尾場演出，完騷後大隊舉行慶功，Sammi亦有出席，眾人同時為8月壽星安仔和Sammi慶生，張衞健（Dicky）捧巨型奶茶造型蛋糕入房，還有安仔的結他造型蛋糕，令他大感驚喜，最後更有第三、第四個蛋糕連環捧出來，安仔和Sammi一齊吹蠟燭，更手黐手一齊切蛋糕，場面溫馨又熱鬧，兩公婆一臉甜笑。
張衞健當Eason面雪恥
至於前晚的演唱會獲陳奕迅（Eason）、黃子華、張繼聰、謝安琪、呂良偉夫婦等圈中人捧場。在獨唱環節，安仔唱《心血》時兩度感觸落淚、唱不下去，淚流滿面接着唱《一步一生》，他感觸說：「呢首歌正喺我軟弱時有人拍一拍膊頭同我講：『你得㗎』，呢幾年我聽到最多呢啲說話，叫我加油，希望大家喺未來咁多不安同未知當中，有一份勇氣行好我哋人生每一步。」
期間，Dicky問Eason有否到場，「第一次BIG FOUR演唱會，阿臣（Eason）入後台話好好，講很好笑，但《身體健康》可唔可以唱好啲呢？當時我條氣有少少唔順，但接受意見，所以剛才閉眼唱，驚擘大眼掛住chok會唱得唔好。好想話畀陳奕迅聽，我專心唱係可以唱到咁樣，要唱好畀陳奕迅聽！」坐在台下的Eason即豎起拇指讚好。
安仔認簽約神燈娛樂
此外，Dicky又呼籲全場為安仔唱生日歌，安仔喜言人生首次有那麼多人陪過生日。完騷後受訪，問安仔怎慶生？他說：「58歲，第一次咁多人同我唱生日歌係好難忘和驚喜，不過畀我揀，我想好似呢兩、三年靜靜地同老婆過就最正！」此外，安仔直認簽約前環球高層黃劍濤（Duncan）成立的「神燈娛樂」，因與對方合作無間，加上已約滿環球，未來大計希望由音樂出發，心願是做好聽的歌。
