謝霆鋒為杭州騷勁揼本自爆搞《鋒味》被當黐線

更新時間：03:00 2025-08-12 HKT
發佈時間：03:00 2025-08-12 HKT

謝霆鋒日前杭州奧體中心體育場舉行內地巡唱首站，近5萬個座位全場爆滿，霆鋒為杭州站重新做一個進化舞台，因場地「大蓮花」是露天設計，為免遇上落雨，特地做一個新頂篷加多幾百盞燈，是香港站破紀錄的2200盞燈再加碼，霆鋒尷尬表示：「加到我都⋯⋯我唔想睇呢個budget啦。」
舞台燒錢，鋒迷應援都癲到盡，有粉絲包起杭州地鐵應援牆及月台幕牆，印上霆鋒型仔相及其經典歌名與歌詞，最癲是有粉絲租直升機於錢塘江上空播歌兼拉橫額，成個杭州抬頭都見到。
此外，當晚播出霆鋒主理《鋒味》的精彩片段，甄子丹、楊紫瓊、張曼玉、周杰倫、陳奕迅、蕭敬騰、吳彥祖、舒淇、蔡依林、Twins等登場。霆鋒向螢幕鞠躬致敬，「我每次轉身睇片都差啲忍唔住（喊）。過去12年，由2013年開始，有咁多厲害嘅朋友陪住我，造就咗呢條片。我諗再過100年都好難再聚齊咁多人，真係好多謝你哋！」霆鋒又謂：「我用咗13年製作呢個作品，一睇到個畫面就想喊！頭5年個個話我黐咗線『做乜走去煮飯？做乜拍啲咁嘅嘢？做乜去旅遊？』，而家就俾你睇吓我做啲乜嘢。」

↓立即下載星島頭條App↓