谢霆锋为杭州骚劲揼本自爆搞《锋味》被当黐线

更新时间：03:00 2025-08-12 HKT
发布时间：03:00 2025-08-12 HKT

谢霆锋日前杭州奥体中心体育场举行内地巡唱首站，近5万个座位全场爆满，霆锋为杭州站重新做一个进化舞台，因场地「大莲花」是露天设计，为免遇上落雨，特地做一个新顶篷加多几百盏灯，是香港站破纪录的2200盏灯再加码，霆锋尴尬表示：「加到我都⋯⋯我唔想睇呢个budget啦。」
舞台烧钱，锋迷应援都癫到尽，有粉丝包起杭州地铁应援墙及月台幕墙，印上霆锋型仔相及其经典歌名与歌词，最癫是有粉丝租直升机于钱塘江上空播歌兼拉横额，成个杭州抬头都见到。
此外，当晚播出霆锋主理《锋味》的精彩片段，甄子丹、杨紫琼、张曼玉、周杰伦、陈奕迅、萧敬腾、吴彦祖、舒淇、蔡依林、Twins等登场。霆锋向萤幕鞠躬致敬，「我每次转身睇片都差啲忍唔住（喊）。过去12年，由2013年开始，有咁多厉害嘅朋友陪住我，造就咗呢条片。我谂再过100年都好难再聚齐咁多人，真系好多谢你哋！」霆锋又谓：「我用咗13年制作呢个作品，一睇到个画面就想喊！头5年个个话我黐咗线『做乜走去煮饭？做乜拍啲咁嘅嘢？做乜去旅游？』，而家就俾你睇吓我做啲乜嘢。」

↓立即下载星岛头条App↓