胡鴻鈞以創作歌《刀削面》回應

更新時間：04:37 2021-09-11 HKT
發佈時間：03:00 2021-09-11 HKT

　　（星島日報報道）纏繞胡鴻鈞多年的整容新聞，他將會於第五集的《演鬥聽》豁達面對，藉創作歌曲《刀削面》回應整容疑雲。
　　音樂節目《演鬥聽》重點環節「我點你作」中，胡鴻鈞（Hubert）用了社交平台一個post創作《刀削面》，將整容新聞擺上枱。當日錄影時，鄭嘉嘉大膽問Hubert有冇整容？有備而來的Hubert話：「都估到你問呢啲問題，用張相嚟答你！before（指着已列印出來的社交平台post），after（指着自己），整容失敗，呢個刀削面可唔可以係嚟緊嘅topic呢？」
Hubert坦言：「嘉賓要攞最有話題性嘅題材做主題，所以某程度上，都係要誠實面對自己，更要豁達將一啲別人眼中未必係最好嘅新聞，透過創作同大家分享，我覺得幾有意思又好聽，其實我之前隻歌《整親》，某程度上都圍繞呢個主題，每個人都會遇到啲負面新聞，希望大家唔好放大呢啲聲音，繼續為追求理想努力。今次嚟到呢個環節，我攞返自己最多人討論嘅話題，希望透過今次新嘅音樂模式，用一個比較funny嘅方式表達出來，最緊要好玩。」
　　問梓軒要Hubert以《刀削面》創作，怕唔怕對方嬲？梓軒話：「我唔驚！反而戥佢開心，因為嚟《演鬥聽》最好玩嘅，就係歌手可以用同我哋一齊創作嘅歌曲去回應負評，今次講『刀削面』，表面上可能會覺得好尷尬，（會唔會令佢難堪？）其實係佢自己攞出嚟，呢個topic佢平時唔會用把口回應，可能佢覺得冇需要，但答案其實已經寫咗喺首歌入面，亦好好聽，我哋希望將花邊新聞變成藝術、音樂。」
　　梓軒補充話：「Hubert同鄭俊弘上嚟之前做好晒心理準備，都知我哋會攞佢身上面一啲素材嚟做歌，我哋從來都唔會逼人去講任何一啲嘢，佢覺得呢個係一個好好發揮嘅題材，我哋咪去配合。」