林海峰唱《努力！奮鬥！加油！》為港人打氣

　　（星島日報報道）林海峰（Jan）的《是但噏Happy Monday》棟篤笑前晚在紅館揭幕，現場以辦公室做背景，道出打工仔各種心態； Jan亦以香港發時事做話題，更無懼家人在台下，即場投訴妻女；首場吸引了俞琤、林嘉欣、阮兆祥、谷德昭、鄭欣宜、歐鎧淳、趙學而及王祖藍等捧場。
　　林海峰在棟篤笑上使出十八般武藝，一人聲演上司、下屬、狗仔、男女外，更扮打乒乓球和滴水聲、甚至唱日本商店歌；之後又獻舞、扭腰擰籮及出動一字馬；並請來黃秋生和葛民輝擔任表演嘉賓，一起合唱多首歌曲鼓勵港人。完場時大會升起一幅黑底白字的巨幕，以Jan新歌歌名《努力！奮鬥！加油！》繼續為港人打氣！
　　Jan以不同環節與觀眾分享工作、家庭、時事各種感受；當中更不乏精警金句。
　　以前「工作係恩賜，休息係放肆」，今日變成「加班係恩賜，加薪係放肆」！今日份工未必畀到幸福你，但畀到少少生活費你，所以搵到的大部分係『正衰工』。打工仔因為太辛苦經常喊住話想放假，但畀我揀，我會揀放監，因『放監唔使返去坐，放假就不過係放風』。
　　「以前權力愈大責任愈大，現在權力愈大隻鑊愈大」，「只係容許下面的人忍夠辭職，從來無上面的人引咎辭職」。
　　Jan稱有天遇上梁朝偉，「偉仔邀請我滑雪，仲用煞食眼神說『你知我幾時都得，我日日都紅假』；同一時間華仔（劉德華）因身體不適，喊住宣布取消演唱會。我以為每個人唔係做華仔（返工）就係做偉仔（放假），但我就係星期一至五做華仔、星期六和日做偉仔，不過每個星期一（放假後返工）都要受無間地獄的痛苦，沾寒沾凍咁臥底病發作，大家經常口講華仔係榜樣，但其實個個都想做偉仔，尤其打風，突然令人由偉仔變華仔！」
　　Jan和太太彭羚育有兩名女兒林泳和林清，「我屋企都有兩個公主，一個19歲、一個15歲，19歲嗰個着啲裙又薄又輕又短，睇到我心都跳埋出來。俗語話『成功男背後有個女人，而失敗爸爸背後總有一、兩個反白眼的仔女』。
　　「常說對小孩要像朋友般溝通，我屋企都有兩朋友，仲住咗好多年，又唔交租，出入又唔打聲招呼，但當自己小孩係朋友，小孩又有無當你係朋友？
　　「現代文明係追求民主，應太太和兩個女要求養狗後，屋企多咗好多笑聲，亦和諧好多。太太為狗梳毛會話『好開心好舒服』，但自從有小朋友後就無對我講過，剩係同我講『好眼瞓』；有日仲離譜到抱狗入房話一齊瞓。到有日佢哋見到我幫狗梳毛，齊聲大叫『Oh Daddy！』喺十幾年來第一次聽到全屋企人叫我，我感覺到自己的存在，令我明白到以生命影響生命。」
　　「我細個好百厭，有次同細佬打架，阿媽兩個都打，打到藤條都爛，唔知我定細佬話要登報脫離母子關係，好彩無；因為咁啱隔籬屋又有兩個仔打交，又係姓林，但林師奶剩係打一個，另一個讚乖要請食雪糕，之後咪打得更勁、打到家變！所以如果今日登報，我會話『本人林海峰及細佬曉峰，感謝我媽以公平、公正、公開嘅方式處理我兩兄弟，絕無大細超，不孝子上！』」
　　Jan曾於舞台劇中飾演出軌男，他稱導演教路只要有掙扎就不是一個壞人，觀眾就會同情。「最初人人都會掙扎，但之後就『正所謂壞咗嘅人寧舍精神，壞咗嘅人先至係人』；『正所謂絕對的權力可以令人絕對的腐化，但絕對武力係可以令人絕對睇化。』」
　　Jan以便服開場，「o氹人笑難，o氹香港人笑好難，o氹呢班唔開心嘅香港人笑係難上加難；相反激嬲香港人好容易，激嬲全香港人都好容易，一個人都可做到。呢幾個月發生好多事，大家都唔開心咁返工，但只要有一個人唔再返工，就令全部人返工好開心，嗰個就係我；大家覺得我應唔應該『下台』換衫開工？」繼而大呼自己的別名「林狗」，觀眾和應「下台」，再笑言立即順應民意，下台換衫開工，正式為演出開鑼。
　　眼看香港人用不同行為、行動去爭取不同的東西時，有很多犧牲，Jan認為犧牲落去唔係辦法，「如果再逼到埋身可以點？咪去盡啲嚟個『極端超級無敵super不合作運動』，就係同自己過唔去，舉例8號風球有假唔放照返工，係香港人最後嘅犧牲，爭取到乜我唔知，但起碼相信差人唔會拉，唔係返工都當我非法集結嘛？
　　「我哋呢啲廢中成日話欠咗啲年輕人，但總係有欠無還，所以誠信破產。我哋成日話做過後生所以知道，但我哋做後生那些年拖手最多拖兩隻，現在嘅後生拖手係拖條鏈出嚟。」
　　「有咁多人叫『加油』係咪收咗錢？應該跟錢無關，係香港人變咗，以前人人叫『香港人炒樓』係賺住嗌，現在叫『香港人加油』係蝕住都叫落去。」
　　棟篤笑的話題好笑與否見因人而異，Jan準備安歌返入後台前，「今晚笑得出，是因為姓林；今晚笑唔出，都係因為姓林，一人做事一人當！」
　　Jan加上黃秋生和葛民輝更有火花，Jan笑指今晚人齊想「搞啲嘢」，秋生即接口，「搞時搞，唔好搞爛啲玻璃，唔係好大劑！」秋生又跟台下一位觀眾笑謂，「你做乜遮住個口，現在戴口罩會畀人拉！」