林海峰唱《努力！奋斗！加油！》为港人打气

　　（星岛日报报道）林海峰（Jan）的《是但噏Happy Monday》栋笃笑前晚在红馆揭幕，现场以办公室做背景，道出打工仔各种心态； Jan亦以香港发时事做话题，更无惧家人在台下，即场投诉妻女；首场吸引了俞琤、林嘉欣、阮兆祥、谷德昭、郑欣宜、欧铠淳、赵学而及王祖蓝等捧场。
　　林海峰在栋笃笑上使出十八般武艺，一人声演上司、下属、狗仔、男女外，更扮打乒乓球和滴水声、甚至唱日本商店歌；之后又献舞、扭腰拧箩及出动一字马；并请来黄秋生和葛民辉担任表演嘉宾，一起合唱多首歌曲鼓励港人。完场时大会升起一幅黑底白字的巨幕，以Jan新歌歌名《努力！奋斗！加油！》继续为港人打气！
　　Jan以不同环节与观众分享工作、家庭、时事各种感受；当中更不乏精警金句。
　　以前「工作系恩赐，休息系放肆」，今日变成「加班系恩赐，加薪系放肆」！今日份工未必畀到幸福你，但畀到少少生活费你，所以揾到的大部分系『正衰工』。打工仔因为太辛苦经常喊住话想放假，但畀我拣，我会拣放监，因『放监唔使返去坐，放假就不过系放风』。
　　「以前权力愈大责任愈大，现在权力愈大只镬愈大」，「只系容许下面的人忍够辞职，从来无上面的人引咎辞职」。
　　Jan称有天遇上梁朝伟，「伟仔邀请我滑雪，仲用煞食眼神说『你知我几时都得，我日日都红假』；同一时间华仔（刘德华）因身体不适，喊住宣布取消演唱会。我以为每个人唔系做华仔（返工）就系做伟仔（放假），但我就系星期一至五做华仔、星期六和日做伟仔，不过每个星期一（放假后返工）都要受无间地狱的痛苦，沾寒沾冻咁卧底病发作，大家经常口讲华仔系榜样，但其实个个都想做伟仔，尤其打风，突然令人由伟仔变华仔！」
　　Jan和太太彭羚育有两名女儿林泳和林清，「我屋企都有两个公主，一个19岁、一个15岁，19岁𠮶个着啲裙又薄又轻又短，睇到我心都跳埋出来。俗语话『成功男背后有个女人，而失败爸爸背后总有一、两个反白眼的仔女』。
　　「常说对小孩要像朋友般沟通，我屋企都有两朋友，仲住咗好多年，又唔交租，出入又唔打声招呼，但当自己小孩系朋友，小孩又有无当你系朋友？
　　「现代文明系追求民主，应太太和两个女要求养狗后，屋企多咗好多笑声，亦和谐好多。太太为狗梳毛会话『好开心好舒服』，但自从有小朋友后就无对我讲过，剩系同我讲『好眼瞓』；有日仲离谱到抱狗入房话一齐瞓。到有日佢哋见到我帮狗梳毛，齐声大叫『Oh Daddy！』喺十几年来第一次听到全屋企人叫我，我感觉到自己的存在，令我明白到以生命影响生命。」
　　「我细个好百厌，有次同细佬打架，阿妈两个都打，打到藤条都烂，唔知我定细佬话要登报脱离母子关系，好彩无；因为咁啱隔篱屋又有两个仔打交，又系姓林，但林师奶剩系打一个，另一个赞乖要请食雪糕，之后咪打得更劲、打到家变！所以如果今日登报，我会话『本人林海峰及细佬晓峰，感谢我妈以公平、公正、公开嘅方式处理我两兄弟，绝无大细超，不孝子上！』」
　　Jan曾于舞台剧中饰演出轨男，他称导演教路只要有挣扎就不是一个坏人，观众就会同情。「最初人人都会挣扎，但之后就『正所谓坏咗嘅人宁舍精神，坏咗嘅人先至系人』；『正所谓绝对的权力可以令人绝对的腐化，但绝对武力系可以令人绝对睇化。』」
　　Jan以便服开场，「o氹人笑难，o氹香港人笑好难，o氹呢班唔开心嘅香港人笑系难上加难；相反激嬲香港人好容易，激嬲全香港人都好容易，一个人都可做到。呢几个月发生好多事，大家都唔开心咁返工，但只要有一个人唔再返工，就令全部人返工好开心，𠮶个就系我；大家觉得我应唔应该『下台』换衫开工？」继而大呼自己的别名「林狗」，观众和应「下台」，再笑言立即顺应民意，下台换衫开工，正式为演出开锣。
　　眼看香港人用不同行为、行动去争取不同的东西时，有很多牺牲，Jan认为牺牲落去唔系办法，「如果再逼到埋身可以点？咪去尽啲嚟个『极端超级无敌super不合作运动』，就系同自己过唔去，举例8号风球有假唔放照返工，系香港人最后嘅牺牲，争取到乜我唔知，但起码相信差人唔会拉，唔系返工都当我非法集结嘛？
　　「我哋呢啲废中成日话欠咗啲年轻人，但总系有欠无还，所以诚信破产。我哋成日话做过后生所以知道，但我哋做后生那些年拖手最多拖两只，现在嘅后生拖手系拖条链出嚟。」
　　「有咁多人叫『加油』系咪收咗钱？应该跟钱无关，系香港人变咗，以前人人叫『香港人炒楼』系赚住嗌，现在叫『香港人加油』系蚀住都叫落去。」
　　栋笃笑的话题好笑与否见因人而异，Jan准备安歌返入后台前，「今晚笑得出，是因为姓林；今晚笑唔出，都系因为姓林，一人做事一人当！」
　　Jan加上黄秋生和葛民辉更有火花，Jan笑指今晚人齐想「搞啲嘢」，秋生即接口，「搞时搞，唔好搞烂啲玻璃，唔系好大剂！」秋生又跟台下一位观众笑谓，「你做乜遮住个口，现在戴口罩会畀人拉！」