李辰安 - 燒烤傾城｜辰來之筆
發佈時間：00:01 2023-05-30
外國人爭相報道這中國奇景
「淄博燒烤」會否成為MBA經典教案？外國人爭相報道這個網上熱爆之中國奇景，你有無聽過？
大師兄率先開口：「安仔，我首先唔講淄博燒烤，不如講下MBA，乜你幾十歲仲想終身學習？」不如大家飲杯茶食個包啦，學海無涯，如果我有時間，咁啱學費唔貴，我都想學下商業管理。「世侄，你就講得無錯，你有無睇晶哥套劇，做媽媽生都要有Marketing Sence，如果依家夜總會仲係好似上世紀八、九十年咁當旺，做女女都要進修商業管理呢一科。」
「前輩，乜做女女唔係要進修演藝課程咩？扮中學生、扮女殺手係需要演技，而不必學市場理論？」銀行偉一邊食包、一邊偷笑，唔知諗乜。「辰哥，我係笑你思想追唔到時代。」大師兄搶住答︰「道理好簡單，做女女都想升級，有十年八年基層經驗之後，就係管理層人才，到時就需要有商管智慧同知識，所以一邊做一邊學一邊讀，將來又係另一位女強人。」
小廚老闆又去完大灣區返嚟，佢問張翁有無興趣蒸條魚，順便同大家報告下內地行情︰「內地消費模式改變咗好多，因為疫情三年之後，大家習慣唔走出街，更加無乜意欲行商場，除非係好有特色又非常有價值之名牌店，連食嘢都由外賣騎手代勞。」張翁問︰「食海鮮都可以外賣騎手代勞？我真係唔多理解。」
當地政府全力催谷 食正Marketing效應
大家無你咁好氣，叫老闆安排蒸海上鮮外，仲要一個蒸水蛋。「內地食魚好多食紅燒炸魚，或者小龍蝦，外賣無問題。」明白，粵式蒸魚外賣就唔合理，其他OK啦，不過，乜小龍蝦係海鮮？「大家都聽過淄博燒烤？搞到全世界關注，燒烤啫，千里之外省份嘅朋友都要逼車去食，去打卡，真係燒烤燒到傾城。」銀行偉話︰「呢啲咪叫做Marketing，燒烤會有幾好味？就算降霜和牛都咁話啦。」呢種Marketing係網紅效應，最緊要都係當地政府識得食住上，全力催谷，又Sell人情味又Sell熱情同效率，如此這般，咪叫做燒烤傾城囉。MBA要好好分析，此乃經典，可供參考之處太多了。
大家好關注瑤柱蒸水蛋多過條海上鮮。「係嘞，睇電視長知識，知道金魚同木魚分別，咁，前輩當年有無去尖東交朋結友？」無人理我，算啦，我食塊魚面珠先，你哋食蛋，但係小心啃到呀老友。「講時講，舞國企業全盛之年，我同大師兄有位前衞女同學，想……」張翁當堂眼珠一轉，好有興趣問︰「你哋位女同學唔係入咗去美國城或者英國城？」
大師兄食完啖飯，佢話︰「嗰位女同學見到報紙報道，最旺場夜總會之媽媽生係揸『Ben跑』開工，又話有女生工作一年就有首期買樓，咁，讀大學有何優越感？」銀行偉話︰「美國、英國之最名牌嗰一兩家大學都有女生出嚟撈啦，新聞見唔少，大家唔好大驚小怪。」
老闆介紹大家飲雲南紅茶，佢喺大灣區買咗幾斤試飲，好茶嚟㗎。「都幾順喉，下次買多幾斤，我要少少返Office飲。」張翁真係識歎，我就好相信如果尖東仲係舞國時代，佢一定會上去飲杯，但佢個口咁密，無人知佢以前有無去過。「依家香港再無如此娛樂事業，大家可以清靜一下，夜晚慢步跑，甚至可以打羽毛球，咁就健康好多。」張翁話︰「香港舞國風雲幾十年，有好多故事未同大家講，晶哥一定拍續集，我同你打賭餐茶，好唔好？」無問題，最緊要開心，等我食埋個魚頭先啦。
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
