KellyChu - 由古時科舉到今天DSE 保佑學子250年鴨脷洲洪聖古廟「文昌開筆禮」摘星奇招 | Executive日記

KellyChu

2小時前

內容

Kelly從事傳媒行業，天天筆耕，知道鴨脷洲洪聖古廟喺上周六舉行「文昌開筆禮」，就好似學生哥咁歡喜，準時到場參與。遇見華人廟宇委員會財務及管理小組主席黃光耀喺現場為市民導賞，令大家對文昌帝君認識更多。小妹祈求文筆清通多姿，而學生哥就希望考試科科摘星。

　　喺中國傳統信仰裏，文昌帝君係主宰人世間功名利祿嘅天神。古時讀書人喺科舉試期前，多會到廟奉祀文昌，求取保佑。文昌信仰深入民間，好多學生及父母會帶同子女到廟敬拜文昌帝君，祈求學業進步。

　　大家排隊入廟，見到地上貼上黃紙，印有「5**、A+、甲、一級榮譽」，非常之貼題。入廟後，學生和市民喺神壇前肅立，向文昌帝君行禮，之後由法師為學生灑淨，寓意潔淨身心，學生按序步至供枱摸過毛筆、蔥及芹菜（即聰明和勤力）。

　　黃光耀仲特別推介，廟內有一支狀元筆，大家摸一摸，考試會更順利。Kelly不用考試，但都摸一摸，祈求文思澎湃，言之有物。除咗導賞開筆禮，黃光耀仲介紹洪聖古廟嘅歷史同建築特色，廟嘅緣起，傳說由順德陳村嘅漁民興建，背山面海，坐落喺龍脈匯聚之地，環境秀麗，風水極佳。據廟內鑄於乾隆癸巳年（1773年）嘅古鐘推算，廟宇有250年以上嘅歷史，廟前廣場有一對人稱「定海神針」嘅木柱，上面繪有龍形圖案，傳說用來抵擋對岸香港仔華人永遠墳場及香港仔舊警署沖來的煞氣，庇護居民。

KellyChu