KellyChu - 維園綵燈會融全運會主題 800燈籠照亮利東街 | Executive日記
KellyChu
1小時前
字體大小
周末過後就係一年一度嘅中秋佳節，月圓這天當然少不了要同親友相聚慶祝，而港九新界各區亦準備咗大大小小嘅節目讓市民參與，小妹藉此精選一些介紹喇。
首先係最大型嘅維園綵燈會，今年綵燈以全運會為主軸並融入五行元素設計，結合人文生活與運動精神，展現中華文明蓬勃生命力，同場加映全運互動區、中秋市集、舞火龍、傳統手工藝示範及自助猜燈謎等活動，與大眾喜迎全運會，歡度佳節。國家級非物質文化遺產「大坑舞火龍表演」亦會於5日至7日登場，中秋當晚（6日）10時半移至維多利亞公園舉行。
行遠少少到灣仔利東街也滿載節日氣氛，今年特別呈獻「喜魚映花月」綵燈會，逾800盞中式傳統及金魚燈籠將點亮整條街道，在皎潔月色映照下，宛如群魚悠游戲水，為鬧市添上一抹浪漫詩意。而喺中秋節當晚更會迎來全新打造長達18米嘅LED火龍閃耀登場，沿中庭至街道兩端巡遊起舞，將節日喜悅推向高峰！
同樣位於灣仔還有另一個燈海，就係石水渠街嘅歷史建築藍屋，花燈數目多達700顆，均由本地藝術家、插畫家、灣仔街坊親手繪製，極具特色。藍屋歡迎大家帶同心愛毛孩前來打卡，感受燈海之美，人寵兩團圓。
想體驗懷舊風情，可以到元朗大橋街市「燈籠街」，每年中秋佳節，街市嘅香燭店都搖身一變，掛起近千個手工製作、造型各異嘅燈籠，其中又以金魚、飛機和兔子款式最受歡迎，絕對係好玩又可以盡情影靚相嘅好去處。
KellyChu
利東街LED火龍表演
