KellyChu - 旅遊事務署新增5地點手機App掃描即睇「城市景昔」覽九龍城經典港產片場景 | Executive日記

Executive日記

KellyChu

3小時前

生活專欄

內容

由文體旅局旅遊事務署推出嘅「城市景昔」旅遊項目，讓市民同遊客在本港多個地點使用手機App上嘅擴增實境（AR）技術，就可以欣賞360度歷史全景圖像。「城市景昔」𠵱家擴展至歷史底蘊深厚嘅九龍城，增設5個指定地點，包括石屋家園、九龍寨城公園、賈炳達道同兩個啟德體育園指定地點（近主場館和近啟德零售館），讓大家輕鬆暢遊九龍城古今。

　　項目運用AR技術，市民每到一個「AR時鐘」，只要透過應用程式掃描上面嘅標記，就可以在手機觀賞由歷史照片或本地藝術家畫作整合而成嘅360度歷史全景圖像。每個場景嘅地標建築，都有根據歷史資料同街坊口述歷史撰寫嘅文字描述，內容豐富充實。九龍城曾經有多部經典電影在區內取景拍攝，項目另一個新增特色，係融入港產電影片段，讓市民重溫，令鍾意睇戲嘅Kelly驚喜，如近年大熱嘅《九龍城寨之圍城》，經典嘅《阿飛正傳》同《喋血雙雄》等。

　　「城市景昔」項目經理梁偉倫講到，九龍城有明顯嘅歷史變化，極具歷史價值。除了啟德發展區和九龍城美食這些傳統旅遊區，團隊希望發掘出九龍城區深度遊嘅價值，亦記錄區內重建前嘅回憶。

　　而負責繪畫石屋家園及侯王廟的插畫家吳嘉敏就話，整個製作用咗3、4個月，繪畫地標側面時需要額外蒐集資料和口述歷史，先可以描寫細節。插畫家黃皓怡話，媽媽以前住在東頭村，製作期間參考咗家人嘅回憶，項目擴展後，會帶她來重遊舊地。

KellyChu