胡慧沖 - 尋找真相 | 筆泰沖動

胡慧沖

3小時前

內容

　　所謂尋找真相，唔係講要尋找一啲兇案或者無頭公案嘅真相，而係泰國旅遊相關事情嘅真相。

　　近年社交媒體發達，好多網頁為咗爭取流量，時會廣傳一啲不盡不實資訊，最出名就係話泰國有一間酒店，裏面嘅泳池恍似多條河道交織，由上而下，個畫面係好靚，但其實係假嘅，根本世間上並冇一個咁樣嘅泳池。又例如廣傳一間酒店有個伸出來的天空泳池，人喺上面游水，泳池下面可以睇得到，話係喺曼谷，但其實呢間酒店根本唔喺曼谷，而係距離曼谷兩個半小時車程，一個叫考艾（Khao Yai）嘅地方。一傳十，十傳百，個個問我呢間酒店喺曼谷邊度？但其實個個都被某啲網頁誤導咗。

　　話說考艾有好多靚酒店，間間都好有特色，而呢間係其中之一。除咗有個伸出來的無邊際公用泳池，從下面可以睇到上面嘅人游水之外，酒店仲有另一種Villa，喺客飯廳都可以睇到上面嘅透明泳池，人在上面游水，另一半就喺下面欣賞，何其寫意！相中呢間酒店（Hotel MYS Khao Yai）喺考艾都好出名，亦算係一間網紅酒店，所以大家請記住，酒店並唔係喺曼谷，一定要以正視聽！

胡慧沖