KellyChu - 帶啤酒「回報」兼還款 人情味爆燈 食客埋單現金不足 老闆一句「得啦」免差額 | Executive日記
KellyChu
2025-08-11 02:00 HKT
字體大小
成日聽人講香港人外冷內熱，Kelly聽到一則令人感動嘅好人好事，印證咗呢個傳聞！近期結業潮不斷，但慶幸人情味未減。有網民去佐敦「小玉家嚐」食晏，埋單時先發現只收現金，唔夠錢畀嘅情況下好尷尬，好在呢個時候老闆霸氣一句︰「得啦」，免去網民差額。
有網民發帖，話自己去「小玉家嚐」食飯後打算埋單，點知坐喺收銀台嘅老闆話只收現金。樓主描述老闆語氣兇惡，即問同事有無$233現金，點知大家都無現金喺身，而樓主即使拎晒銀包僅剩嘅$200都唔夠畀。眼見情況不妙，佢內心驚慌不已，心諗「大鑊，點算」。
Kelly之前都試過類似情況，有時為免店家誤會，都會同店員講聲，或擺低個袋去撳錢。而當樓主一籌莫展嘅時候，老闆居然開口拋下一句「得啦」，免走張單$33嘅差額，令佢難以置信！樓主大吃一驚，連忙拒絕，表示「點得呀」，指自己下次會補返數，但老闆豪氣咁叫佢︰「唔好講呢啲」。
件事當然未完啦！知恩圖報嘅網友後來帶同現金補回所欠差額，又帶多罐啤酒請老闆飲，表示「好人要有好報」，令呢個故事畫上完美句號。市道雖然唔景氣，但香港人依舊同舟互濟，實在令人動容！
KellyChu
更多文章
