KellyChu - 增80參展商 50珍罕螳螂首亮相主題館 寵物用品展匯400多攤位 「主子」「奴才」齊掃貨 | Executive日記
KellyChu
2025-06-07 02:00 HKT
字體大小
Kelly噚日喺會展見到好多主子同牠們嘅奴才呀！事關第12屆優質寵物用品展今個禮拜舉行，聽講今年攤位數目突破400個，參展商比去年增加80間，涵蓋寵物食品、飲料、服飾、玩具、護理清潔等。展覽期間，不少寵物用品低至一折，大家不妨帶埋毛孩，一齊去逛逛。
唔好以為得貓貓狗狗，大會今年首辦螳螂活體主題展覽館「螳潮滙展」，展出世界各地近50種珍罕螳螂品種、明星級螳螂，包括來自非洲坦桑尼亞嘅魔花螳螂、亞熱帶嘅蘭花螳螂、東南非嘅刺花螳螂、印度嘅小提琴螳螂，仲有現時世界上體形最大嘅東非瘤刺螳螂，同埋多種來自亞熱帶嘅模仿大師枯葉螳螂。
「甲蟲の森」展珍稀甲蟲
一次性搜羅咁多品質嘅螳螂不容易，不單止涉及地理環境因素，還需耗費很大的人力物力，今次螳螂展可以話極具觀賞及科普價值。而沉浸式「甲蟲の森」展館就有多款珍稀甲蟲，包括甲蟲王者獨角仙、世界最大甲蟲海克力斯長戟大兜蟲，同埋色彩斑斕嘅彩虹鍬等。
Kelly仲喺現場睇到許多有趣又實用嘅寵物用品，有參展商推出好有香港特色嘅寵物玩具，例如「香港茶樓點心寵物玩具盲盒」，當中有蝦餃、杞子燒賣、流沙奶黃包、糯米卷，同埋隱藏款豆腐花造形嘅玩具，增加可以隱藏零食嘅口袋，而且會發出「吱吱」聲同搓揉紙張聲音，吸引狗主子嘅興趣。除咗「茶樓點心」，仲有港式奶茶同菠蘿油、雞蛋仔同格仔餅。
當然唔少得請來貓主子當生招牌嘅參展商，宣傳夏日感應式涼風墊，介紹說這款產品係香港首創，結合靜音風扇與涼感外套，令寵物享受清涼同時，亦不會受到噪音干擾。
KellyChu
港式奶茶造形的寵物玩具。
貓主子體驗全港首創夏日感應式涼風墊。
最Hit
