KellyChu - 何永賢化身「師傅」操作一眾建築機械人亮相房屋局辦武林大會 5油漆機械人「髹」實力 | Executive日記

KellyChu

5小時前

內容

房屋局引入建築機械人協助解決人手問題，昨日更舉辦「武林大會」邀請5款油漆機械人喺房屋局局長何永賢見證下「鬥髹油」，另有6款建築機械人同場亮相。何永賢亦化身「師傅」操作6米高嘅油漆機械人，親身示範科技嘅力量。

　　參與「武林大會」嘅5款油漆機械人都係來自內地公司，佢哋分別於模擬搭建嘅單位入面進行比賽。大會以準確度、施工速度、塗層均勻度及表面處理品質，作為評分依據，結果最快完成比賽嘅機械人公司為方石科技，用時約15秒。

　　何永賢指，油漆機械人可將油漆施工效率提升50%，以一層有24個單位嘅公營房屋項目為例，傳統上需要8位專業工人完成油漆工作，但改為用機械人協助，則只需2位技術員操作，強調機械人可以提升工地安全，同時解決行業人手短缺問題。

　　立法會議員梁文廣表示，目前公屋建造成本中，以人手成本佔比最大，即使日薪3000元都唔容易請到工人，且熟手工人年齡普遍較大，有機械人協助不但減輕人力成本，亦減低因發生意外而停工嘅風險以及背後額外成本；機械人也可以喺工人休息時接替工作，速度或質素上都可以有所提升。

　　除咗5款油漆機械人之外，昨日房屋局仲展示咗6款有潛力應用於建造公營房屋嘅機械人，包括紮鐵機械人、地磚鋪貼機械人、鐵器切割機械人、6米高三合一牆面處理機械人、混凝土內牆面打磨機械人，及不用人手操控嘅室內測量掃描無人機。
KellyChu