KellyChu - 鄧炳強薦紀律部隊古蹟遊周末「走一轉」細味歷史打卡 | Executive日記

KellyChu

23小時前

內容

　　適逢內地五一黃金周，大批同胞來港享受假期。保安局局長鄧炳強亦喺自己社交平台推介紀律部隊特色建築，包括舊油麻地警署、山頂警署、紅棉路婚姻登記處、1881以及大館，建議大家可以去影相打卡，細味紀律部隊歷史。

　　局長喺帖文中寫到：周末喺香港唔知去邊好，不如走一轉紀律部隊歷史建築遊，舊油麻地警署、山頂警署、紅棉道婚姻登記處等等，每一個都富有香港歷史特色。仲建議如果想了解更多紀律部隊歷史，可以去埋個別紀律部隊博物館。

　　大館係香港法定古蹟，為現存少數建於十九世紀嘅警署建築之一，館內有16座經保育活化嘅歷史建築，包括前中區警署、中央裁判司署及域多利監獄。活化後已成為香港其中一個藝術文化地標，為大眾提供多元化嘅藝文活動以及導賞團。

　　而前身為水警總部嘅1881亦在1994年被列為香港法定古蹟，活化後成為雲集多間國際品牌名店、時尚食府嘅高級商場，喺古蹟裏面shopping、打卡，又係另一番感受。

　　帶有愛德華式建築風格嘅舊油麻地警署，一向好受內地遊客歡迎，不過最近小紅書上有人將佢列入「避雷景點」，話只係影到一道小門、一面牆，唔建議專程去打卡。

　　雖然香港咁多年來一直發展新樓，但亦保留咗唔少有價值嘅歷史建築，希望遊客嚟到嘅時候都可以去探索一下，了解香港繁華背後，也有屬於自己嘅文化和故事。

KellyChu