KellyChu - 「軟心膳」助吞嚥困難者嘗色香味俱全菜式 美心夥煤氣公司送萬份軟餐予老友記 | Executive日記
KellyChu
2025-04-30 02:00 HKT
字體大小
連鎖飲食集團美心昨日舉行「軟心膳」發布會，宣布推出軟餐產品，幫助有吞嚥困難人士重拾飲食尊嚴與樂趣，令佢哋即使咀嚼功能減退，亦能品嘗到色香味俱全嘅菜式。美心未來數月會同煤氣公司合作，免費供應近萬份軟餐給護老院舍長者享用，聖公會亦會安排言語治療師為老友記評核吞嚥能力。美心更宣布，將以成本價出售軟餐給聖公會轄下院舍，大家拍晒手掌。
「軟心膳」目前推出嘅3款軟餐包括中式點心拼盤，有蝦餃、燒賣、雞肉鮮蝦菜餃同埋蘿蔔糕，以及「香草雞鎚飯」和「瑞士雞翼飯」。美心集團港澳首席營運官蕭德威指，佢哋嘅軟餐係按照香港社會服務聯會提供嘅專業意見，以及《照護食標準指引》和「國際吞嚥障礙飲食標準（IDDSI）（第4級）製作，確保軟硬度和黏稠度達到吞嚥困難者嘅食用規格。
煤氣公司營運總裁—香港業務暨可持續綠色能源辦公室總監鄭曉光指，美心對於香港可持續發展及社會責任好有承擔，所以當佢接到合作邀請時，連計劃書都未睇便說好，坦言自己將來變老也可能需要食用軟餐，因此呢個係每個人嘅切身問題，煤氣公司好樂意支援活動，亦希望致力加深市民對軟餐嘅認識。
勞工及福利局局長孫玉菡昨日也有出席發布會，佢認為有吞嚥困難嘅老友記，可以藉軟餐重拾美食樂趣，呢種幸福感係大家無法想像，軟餐亦為現時老齡化社會帶來機遇。孫玉菡提到，透過政府社區照顧劵購買軟餐嘅受惠長者，已有超過1.8萬名；中小企亦可以申請社署樂齡及康復創科應用基金，補助研製軟餐所需要用到嘅器材購置費用。
KellyChu
老友記試嘗中式點心拼盤軟餐。
