胡慧沖 - 今年缺席潑水節 | 筆泰沖動
胡慧沖
2024-04-12 02:00
字體大小
在泰國生活了二十多個年頭，就算疫情期間，也會參與泰國的新年潑水節活動，但偏偏今年就要缺席……
原因是泰國政府旅遊局香港辦事處每年會在商場舉辦泰國節活動，而今年舉行日期是4月13及14日，撞正潑水節的日子，由於小弟返嚟香港參與活動，唯有缺席泰國的潑水節。雖然此時此刻九龍城都有潑水節，但因為有重任在身，所以都未能趕往支持，希望大家玩得開心啲吧！
話說這個一年一度的泰國節，將會於明天起一連兩日在奧海城商場舉行，泰國政府旅遊局會在這裏設一些攤位，邀請各大旅行社到來分享旅遊經驗及資訊，也會大玩遊戲，有嘢送，當然包括送出機票與酒店住宿。小弟有幸一直以來都獲邀請到來參與，除了分享旅遊資訊，更大膽地在台上唱出自己節目的主題曲，今年更有一首新的插曲，新歌出爐好驚記唔到歌詞，但都堅持要唱Live，真係考自己嘅膽識！
去年跟我同行有冬蔭妹、冬蔭哥哥，三人行一齊到來表演場面都幾熱鬧。今年則換了Partner，將會專誠飛過來的是冬蔭表姐。近日在社交媒體上載了表姐的Video，都有好多人讚話佢似陳煒，又話佢好高貴……其實這位表姐英文名叫亞Yen，爸爸係泰國導遊，阿媽係香港人，識講流利而純正嘅廣東話同泰文，但偏偏唔識睇唔識寫中文字。佢係我其中一個電視節目裏面嘅拍檔，今次跟我來到香港參加旅遊局的活動，會和我一齊上台載歌載舞，希望唔會同我唔啱Key啦！有興趣嘅記得聽日、後日早上11點至傍晚6點在奧海城見，齊來支持泰國旅遊業！
胡慧沖
更多文章
