Jacky哥 - 第25屆渣馬開跑 賽事體驗提升|企業熱話
提到全港最大型、最多參賽者嘅體育盛事,就一定係渣打香港馬拉松。適逢渣馬踏入第25屆,同時本港防疫措施亦鬆綁,香港田徑總會行政總監伍于豪預期,今屆賽事正值復常路上,活動氣氛會比上屆更為熱鬧。而為咗慶祝第25屆里程碑,渣馬嘉年華會喺2月9至11日於維園舉行,公眾除咗可以喺印有跑手名字嘅「跑手牆」打卡之外,更可以到「渣馬歷史牆」欣賞過去24屆嘅獎牌珍藏。「今屆跑手亦會獲贈第25屆渣馬紀念獎牌,我哋更特登為比賽當日(2月12日)生日嘅跑手送上生日禮物包,當中包括換領生日蛋糕,希望帶嚟更好嘅賽事體驗和盛事氣氛。」

今屆渣馬係今年防疫限制放寬後首個國際體育盛事,意味住同社會一齊跑向復常。本屆賽事亦將會回復集體起步,並喺維多利亞公園終點重新設有公眾打氣區,市民亦可到賽道附近感受現場氣氛。籌辦渣馬從來不易,所謂計劃趕不上變化,即使疫情緩和,賽事安排仲係會不斷隨狀況而改變。「同以往籌辦渣馬最大分別,在於以前嘅活動時間表相對固定,許多宣傳工作都可以提早準備,但現時就要跟隨最新防疫政策嘅變動而即時應對,仲要盡快俾參加者最新的防疫資訊,挑戰性大了很多。」香港田徑總會高級公關及市場推廣經理黃卓敏表示。
Jacky哥
更多文章