古星輝 - 5G@果欄｜乜都5G
古星輝
2023-07-28 00:00 HKT
字體大小
平日好多人專程組團，夜麻麻到油麻地果欄團購生果，大批入手貴價西瓜、哈密瓜、日本桃、車厘子、藍莓等，貪嗰度價平又新鮮啲。
最近我哋嘅同事亦日日夜訪果欄。佢哋T恤、牛仔褲、背囊加平板，仲要一人一篋（裝5G路由器），浩浩蕩蕩，午夜時分走進燈火通明、人頭湧湧嘅果欄，唔係團購，係向生果批發商（欄商）推介即插即用，毋須拉線嘅5G寬頻。
果欄有200多個攤檔，位處油麻地，油尖旺屬電訊服務嘅黃金地段，一向係電訊商必爭之地，喺網絡規劃、基建及覆蓋方面都盡善盡美，好似我哋喺嗰度嘅5G覆蓋就超過99%。同事睇準呢點，希望能吸引批發商試用5G，邁向數碼轉型。果欄歷史悠久，但隨著時代變遷，許多欄商已由新一代掌舵。面對來自超市及其他店鋪嘅競爭，仲有數碼洪流嘅衝擊，許多掌舵人都已採用社交媒體宣傳同接單。佢哋有自己嘅網站，用電腦落單、電子支付，對新事物嘅接受能力十分高，其中包括5G。
萬物連接 提升效率
為鼓勵中、小、微企客戶試用5G寬頻，我哋提供嘅服務計畫門檻富彈性，仲係「真無限」（不設頻寬上限）嘅計畫；加上安裝靈活，穿透力強，能夠兼顧鋪頭嘅死角位，更有效萬物連接。因此，好多欄商都樂意試用，以提升工作及營商效率，喺鋪度睇片同用社交媒體更新生果資料都快人一步。
我哋嘅同事捉緊機遇，每晚到果欄尋求機會。佢哋趁掌舵人一有時間，就即場示範最新服務，詳細講解，仲幫欄商以5G連接閉路電視系統、鏡頭、POS收銀系統等，方便佢哋工作。我哋好努力喺唔同嘅社區默默耕耘，逐步提升5G嘅滲透率，等各行各業嘅商戶，都能受惠數碼轉型，加快香港邁向智慧城市嘅發展。
和記電訊香港行政總裁
古星輝
最Hit
更多文章
