頭條戲場 - 《Barbie芭比》快樂地接受自己甩頭甩骨｜頭條戲場
好多人以為電影又粉又膠，糖衣電影笑完過癮完散場乜事都冇發生過。導演係《不得鳥小姐》嘅Greta Gerwig，點會咁簡單。場景同美術超靚，玩膠玩到言之有物，爆笑位多到數唔到，驚喜度10層樓咁高，片長兩小時非常享受。以為電影已經好精彩，估唔到討論區更癲，觀眾爭論戲中的男權女權劇情超有火藥味，芭比延伸系列一樣咁好睇。（上映中） 撰文：廖思慧
電影並非大路娛樂片，話佢係哲學片亦唔過分，好多家長帶小朋友去睇咪唔明囉？咁每個人都會有自己睇到嘅嘢，冇問題嘅。首先要讚Mattel，一間歷史咁悠久嘅大公司願意畀導演咁樣奚落品牌，唔只寸仲要狠狠地玩盡黑歷史，好癲。
Ken學人做大佬
一向完美的芭比（Margot Robbie飾）發現自己有口臭、腳踭踮地，大髀仲要有橙皮紋，最重要學人講死亡，人味漸濃，大驚下求助怪芭比，挑通眼眉，講嘢極mean的她提議芭比去現實世界，搵返玩爛佢嘅主人搞返掂佢。由女人話晒事的Barbieland去到男人當道的現實世界，芭比尋靈魂之旅正式開始，導演亦好好利用陪芭比一齊走入現實的Ken（Ryan Gosling飾），借呢位芭比陪襯品建構一個有嚴重男女衝突的麻煩世界。
電影有大量過癮致敬位，由《2001太空漫遊》到《阿甘正傳》再到《油脂》，玩meme式笑位亦相當多，如諷刺男人睇完 《教父》自覺好多體會，真心笑出聲。至於被觀眾鞭得最多的男女權都係面嗰浸，其實係講自己條命自己話事，男女都係，芭比主人Gloria（America Ferrera飾）嗰段摑醒芭比們的一番話值得流傳萬世，而芭比同芭比之母Ruth的對談亦非常重要，「就算自己個女都冇權亦冇能力去控制對方，只能留喺原地睇個女可以走到幾遠。」
以為甜耶耶，原來又mean又辣又感動，笑位極多，Ryan Gosling黐鬼線爆seed演出，接受自己唔完美真係咁難咩？
