阿碌開咪｜愈睇拜登愈替美國……
《名家合集》收錄名人文章，分享觀點，探討時事。
2022-02-04 09:58 HKT
字體大小
假若我是美國人，一定會日比日擔心。點解？因見到國家最高領導人，愈來愈唔對路。講野口震震，精神明顯不足，恍似有多少老人癡呆現象。面對記者提問，皆反應遲緩，間中問非所答。
其實去年佢上任時，已狀態不算太好。如今捱咗大段高壓日子，明顯生理心理皆能量滑落。快八十歲了，正牌老爺車，點搞都唔會變回超級跑車，如何可以頂埋餘下三年任期而唔冧「偈」呢？
睇款，任何時候架「車」都會出事！
今天美國兵凶戰危，日日與俄國及中國拗手瓜，西方國家又未見誠心誠意合作，冇乜興趣旗幟鮮明認你做大佬，歐盟各國寧願搞自己的「團結就是力量」。
一個弱勢總統，必會導致內憂外患。國內共和黨，尤其「狂人」特朗普，唔開盡Turbo砌你就奇。就算民主黨及白宮之內，亦因領導唔夠英明神武，有少少散散哋，勢頭甚弱。
最弊，假若拜登有乜頭暈身馨，憲法上頂上的副總統賀錦麗，又愈來愈不對路，底牌實力見盡，冇乜料到。近日見佢出鏡，已不復神采。
美國對內大撕裂，對外則面對一個「強肉強食」森林，點砌？老狐狸普京最叻趁你病攞你命，一於在烏克蘭問題上企硬。
普京企硬，當有其因。老友，烏克蘭與俄國邊境接壤，若落在北約系統（俄國的死敵），等於「危害俄羅斯國家安全」，當然同你死過。
呢個世界，一講政治，只有各自利益及安全，絕對冇話你啱定我錯，純睇企甚麼立場！
呢場「沙蟹」，美國雖然要扮大佬，不過，普京睇死拜登優柔寡斷，當然食住佢嚟砌，肯定有排磨。
烏克蘭危機令美國頭暈身馨，天降良機，北韓「肥仔金」立即趁你病恢復導彈試射，flex muscle。
中南海方面，一眾領導人也可開返支茅台鬆一鬆，因近幾年被美國佬逼到唞不過氣。如今，起碼有段安寧日子過。世事難料，若拜登搞唔掂普京，到頭來可能要求北京幫忙，咁就好睇嘞！
曾智華
阿碌開咪
美國總統拜登。AP圖片
最Hit
港女疑被鄰居篤灰公屋富戶！每晚返去陪嫲嫲食飯 被指「揸豪車出入」 網民︰為咗3K乜都做得出
2026-05-08 15:34 HKT
鄭欣宜跟靚仔醫生合照流出 神態羞怯身形再有變化 被讚一部位狀態A+感情狀況惹議
2026-05-08 18:30 HKT
中國觀察：七架運輸機赴京 特朗普何以勞師動眾？
10小時前
更多文章
