【阿碌開咪】專家唔聽，聽「佢哋話」

名家合集

《名家合集》收錄名人文章，分享觀點，探討時事。

2021-09-02 09:30 HKT

時評專欄

內容

日日出入酒樓食肆茶記，我聽得最多的，一定是講錢錢錢錢錢！似班傻佬講完錢，錢就會從天而降咁款，真無聊。

另一種個個不停講的，就是口頭禪——佢哋話。乜都「佢哋話」一番，究竟乜叫「佢哋話」？「佢哋」又係邊個？有幾巴閉？一概唔知。總之個個「佢哋話」一輪之後，就冇人問Source。怪雞！

昨晚聚餐，在座又有一個猛咁「佢哋話」嘞。

事緣政府擺明對唔打疫苗者步步進逼，收網咁，愈來愈緊。由開始的「自由決定」，到早前的唔打要自己畀錢檢測！

最新，提出四招谷接種率，包括：一、高風險場所工作人士，必須強制接種（再冇選擇！）；二、企業促員工接種，否則自費定期檢測（又煩又要出錢，點頂？）；三、安排醫護到屋邨為長者接種（呢招最正路）；四、研究未打針者禁入指定場所（最攞命！即可能未打針者，分分鐘處處貼出「疫苗禁足令」，搞到你變公眾場所「二等人」，別人入得你唔得！）。

第四點，放住風先。大家必須有心理準備，為谷針，必定一步步逼埋嚟！

打唔打針，當然屬個人基本自由。

小弟乃最早一批公開飛身去打針者。原因ABC咁簡單，就是到目前為止，只有打針屬避免感染及傳播病毒最有效方法，亦只有人人打齊針，社會才可逐步恢復正常。

對，若果有其他辦法選擇就更好，弊在到今天，全世界都冇噃。

昨晚聚餐，人人打晒針，可以坐D區，「照住」一位未打者。問問佢，為乜唔打。

「佢哋話，會打死人，打到你中風，打到你面癱，打到你心臟病㗎！」

「係咩？邊個係『佢哋』呀？專家？做乜你會信嗰個『佢』呢？話畀我知神秘人物係邊個吖？」

「唔係知名人物，總之，『佢哋』話政府為咗引市民打針，將大量不利消息，包括幾多人打死咗都隱瞞㗎！」

點解我會同呢種白癡「佢哋話」一族共飯㗎？

曾智華

阿碌開咪

政府再出招冀提升接種率。資料圖片