【阿碌開咪】香港成功之道——能者居之
《名家合集》收錄名人文章，分享觀點，探討時事。
2020-12-17 10:31 HKT
字體大小
相信大部分香港人都會同意，現今香港，真的是「管到一鑊泡」！
九七前，小弟不停代表電台到外地開會，不少外國同業非常羨慕香港的驕人成就，個個問：「Luke，香港有乜成功之道？」
答曰：「四個字——能者居之！」
能者居之，唔使解釋啩？香港素來是一個開放城市，廣納全球人才，有料的，來者不拒，沒有太多門戶之見。加上稅率低，夠自由，小政府，簡簡單單已跑贏全球城市。
這句聽之好似簡單，但要落實，乃一門極高藝術！首先，是要打破保護主義。
我當然支持基層工作要保護本地就業，但一去到中層及專業工種，想城市起飛，一定要開放，吸納全球精英。香港有兩個成就超卓的機構，一為港交所，一為香港馬會，由乜人管的呢？兩個皆非「香港人」。港交所總裁李小加，連廣東話都唔掂，但管理這個全球頂級機構十一年，成績有目共睹，絕對超越前幾任土炮香港人總裁。
另外，香港馬會總裁應家柏，收取全港CEO最高薪金，乃一位德國人。佢武功之高、能力之強，馬會之內，無人不服，肯定也是馬會歷史上最卓越的總裁，引領香港賽馬事業，不停攀上更高水平，傲視同儕。
我是鄧小平「貓論」信徒，即——白貓黑貓，捉到老鼠的就是好貓。由此思路進，小弟認為想香港重現昔日光輝，首先要打破公職保護主義，將政府高層位置，除涉及國防外交（似冇乜喎）及意識形態決策位外，一律開放獵頭全球精英出掌。
政界也應如是觀。最近，不停有人問我對「紫荊黨」點睇。睇乜？話之佢係紅橙黃綠青藍「荊」黨，香港歡迎的，就是卓越政治人才。你有乜信念、係乜背景、嗌乜口號，全部次要。最重要，「捉唔捉到老鼠」先？若舊一群建制保皇黨唔掂，又擺明唔夠料，為乜唔引入更多各路人才？
再講一次，香港成功模式，素來是能者居之，無能者，唔該立即引退下台！
曾智華
阿碌開咪
編按原題為「香港——能者居之」
港交所總裁李小加管理這個全球頂級機構十一年，成績有目共睹。資料圖片
更多文章
