【阿碌開咪】唔走！分析變化！

名家合集

《名家合集》收錄名人文章，分享觀點，探討時事。

2020-12-10 10:17 HKT

時評專欄

內容

上周，香港電台又重播一九八六年的《鏗鏘集》，講移民。片中有介紹離開者的心路歷程。至於回流的，編導就搵咗小弟一家。我一九八五年跟隨父親移民多倫多，本意與哥哥開展家族生意，延續老父的願望。點知，住落一個星期，已發覺自己恍似一條鹹水魚，跳咗落個淡水湖，很快已有窒息之感。死火！點搞好呢？再下去三個月，更百分之一百肯定自己不是營商人才，又冇興趣。幸而，哥哥相反，非常適應與享受。於是，我立即部署返港，碰啱父母皆不適應加拿大，因出入不便，又凍又冇朋友，於是，決定回流。先用一年時間搞清一切後，立即飛身回到這個心愛的城市，重新加入香港電台「搏命」（真的是搏命，因失去過心愛的工作，有機會再開展，怎不爭分奪秒去「享受」？）。

當時，移走的人多不勝數。一士諤諤回流的，非常難搵，於是《鏗鏘集》就捉我一家做人辦，由老父接受訪問，道盡移民生活的「苦況」。

想不到，三十幾年來，不停重播又重播。上周，有朋友睇到，又問：「走唔走？」

「為乜要走？咁辛苦身水身汗才回流！」

「……」對方眼神說明一切，低聲講：「走難呀！」

每個人感受都不同，大家有自由去為未來生活作抉擇。冇乜啱唔啱，互相尊重已可，亦不需要游說別人認同甚麼理念。小弟乃一個百分百傳媒人，體內流着的，也是典型傳媒人的血。我這類人，最怕平靜，最怕「冇事發生」。因如此，仲有乜「好玩」？若世情不變，一潭平靜死水的話，又有乜可以分析呢？

接近中央者早拉我講：「今年香港將開展『騰籠換鳥』政策，你靜觀其變可也！」

大家前日打開本報A3版，已見一個新政黨「紫荊黨」誕生，揚言吸二十五萬黨員。三位領頭人皆內地出生，但在港長大，飲過鹹水，並曾在外國機構工作。老友，「新鳥」已開始入局，這個變化，非常有趣，畀我大把分析機會也。

曾智華

阿碌開咪

(Richard Kidger / Unsplash圖片)