港女大鬧越南機場狂數男友「叫雞」 家暴大控訴：「佢打我40拳！」混戰至機艙推跌空姐 香港快運有回應｜Juicy叮

有港情侶昨日（2日）大鬧越南峴港機場，由候機室混戰至機艙，女子當眾力數男友「叫雞」，更控訴遭家暴，上月初（10月）曾被「打40拳」，聲稱「醫院有紀錄」。女子至機艙情緒越發失控，哭鬧間一度推跌空姐，其男友則反駁指女方出軌，又稱她有精神病。

涉事為香港快運昨晚由越南峴港飛往香港的航班，該航班原定晚上7時25分開出，結果須延誤約35分鐘。事發經過的影片，在網上瘋傳，全程如下：

港女大鬧越南機場狂數男友「叫雞」 家暴大控訴：「佢打我40拳！」混戰至機艙推跌空姐 香港快運有回應↓↓↓↓

有網民昨在社交平台發片發帖表示，香港快運一班由越南峴港，飛往香港的航班，原定7時25分開出，結果因一對情侶爭執導致航班須延誤約35分鐘。

樓主發布事發時的影片，一對情侶在候機室發生激烈爭執，涉事女子微胖身形，頭紮兩個蝴蝶結，男方則較瘦削。片中開頭男子大聲指女方出軌，男子當時坐著，女子則站在其身前，有力壓之勢。

蝴蝶結港女：「我有見到佢叫雞呀！」

女子聞言即激動地向圍觀者指罵男友：「佢叫雞呀！佢叫雞呀！我有見到佢叫雞呀！」

男子這時欲起身，但被女方阻止按實，女子以手壓著男方，向圍觀拍攝者表示：「佢有叫雞呀！你鍾意影就影啦！佢鍾意影就影啦！」

「佢打我40拳，醫院有紀錄㗎！」

男方最終未能掙脫起身，女方又按實他指控曾遭家暴：「佢打我40拳呀！港怡醫院有紀錄......佢打我40拳，醫院有紀錄㗎！」男方這時出言反駁，但片段未能清楚錄到內容。

這時女子扯著男友不斷說：「係呀，我有證據呀，擺上網！係你嘅損失，知道晒你嘅衰嘢！」

其後，女子繼續指罵男方打她40拳，不斷質問他：「你打我40拳呀！你有無打我40拳呀？！打我40拳呀！10月1號，港怡醫院有證據，你打咗我40拳呀！」

男方這時別過頭，不理會她，片段聽到現場有圍觀者感驚訝：「嘩，打40拳。」

「我要同佢坐！依家係佢做錯嘢喎！」

另一段影片在機艙拍攝，該名女子情緒非常激動，樓主表示，該對男女辦理登機證時，原被安排分開坐，但上機後，該女子要求坐在男友身旁，向空姐要求不果後再起事端。

片段開頭可見，女子激動失控，兩名空姐嘗試攔阻，其中一名空姐被人推跌，有乘客目睹混亂情況驚呼「Oh, my god！」

一名空姐從後攬實該女子大叫：「冷靜啲呀，小姐。」該女子則表示：「我要同佢坐！佢做錯嘢！我要同佢一齊坐！係佢做錯嘢喎！」

「係咪全香港人都唔幫我呀！」

女子不斷向空姐狂數男友有錯在先：「係佢做錯嘢喎！」空姐見女方情緒仍然失控，要求她下機：「唔好意思呀，你要落機啦！」

女子這時突然冷靜起來，問道：「咁我唔落啦，依家冷靜，係咪畀我坐呀？」但空姐堅持她要落機：「唔係囉，對唔住呀！我控制唔到你！Sorry！」

女子聞言又再激動起來，大叫「唔落機」並衝向男友，兩名空姐拼力攬實阻止，並大叫「冷靜！冷靜！」

女子哭鬧起來：「依家想我點呀......係咪全香港人都唔幫我呀！依家係佢做錯事！」她越說越激動反問空姐：「依家做錯事係佢喎！你係咪唔企我果邊呀！」

空姐安撫：「男人係咁㗎啦」

兩名空姐不斷安撫她，但女子竟嚎哭起來：「你哋係咪蝦我呀！你哋係咪蝦我呀！」空姐再安言相勸，請她到前面：「我幫你！一齊去前面，一齊返屋企先，好唔好？！」

女子聞言情緒慢慢冷靜，哭聲收斂起來，空姐再道：「乖！男人係咁㗎啦，我哋過去（前面）......」

男友反駁：「我有，我Ｘ街死呀！」

這時女子的男友突然大聲說：「你聽佢講？你聽佢講咩呀！我有，我Ｘ街死呀！佢精神病㗎！」一名空姐以手示意男方不要出聲，該名女子聞言又再嚎啕大哭，並質問男友：「你講咩呀！」

空姐再勸道：「我哋明㗎，我哋去前面，一人讓一步好唔好！我哋返香港先啦！一齊返香港，依呢到點鬧都無用。」

網民：辛苦晒空姐！

樓主表示，最終這對情侶被機組人員請離機艙，這班原定晚上7時25分開出的航班，因此延誤約35分鐘才起飛。

帖文引發熱烈迴響，不少網民大讚空姐處理專業：「辛苦晒空姐！」「辛苦班Crews，覺得班Crews處理得好好，首先分開咗兩個坐，有爭執已經係兩人之間擋住。盡量安撫情緒激動嘅女事主。」

根據第494章 《航空保安條例》 第12B條「與難受管束行為有關的罪行等」，在飛機上故意妨礙機組人員、或作出擾亂秩序的行為，以致危及或相當可能會危及該飛機上的良好秩序和紀律，即屬犯罪。

香港快運：對受影響乘客致歉 衷心感謝機組人員專業表現

香港快運發言人今午（3日）回覆《星島頭條》表示，兩名乘搭UO559航班（由峴港前往香港）的乘客於11月2日（星期日）登機時發生爭執。機艙服務員按既定程序處理事件，之後安排二人下機。航班最終延誤約1小時25分鐘，並於香港時間晚上10時50分安全抵達。

發言人表示，乘客及機組人員的安全一直是香港快運的首要考慮，機組人員均接受嚴格訓練，能夠冷靜及專業地處理各類突發情況，衷心感謝機組人員在事件中的專業表現。就今次事件對乘客造成的不便，香港快運深表歉意，並感謝乘客的耐心與體諒。

來源：tommytcwtang＠IG

同場加映：港夫偕妻北上隔籬房會小三斷正 妻拍門捉姦大鬧酒店：「你叫你隻雞出嚟，大家對質下！」↓↓↓↓