【阿碌開咪】中電大勝兩馬位
《名家合集》收錄名人文章，分享觀點，探討時事。
2020-11-17 09:10 HKT
字體大小
首先申報利益，小弟的投資組合，有中電股票。原因？簡單，這隻公用股，派息穩定。而且，受政府政策保護，有個金剛罩名《管制計劃協議》，可賺盡每年八巴仙利潤。做佢股東，「定過抬油」（古時有個賣油郎名韓全，武功底子深厚，每日挑着大桶生油到市場叫賣，兩腳走路飛快，但竟可一滴油也不濺出來，令人嘖嘖稱奇！於是，就為全叔創作了一個形容詞——定過抬油！）。
上周，兩電因電費調整上立法會解畫。呢類民生議題，一講到加價，當然被跨黨派議員鋤到飛起，大喝不但唔應加價，更應減價！
每次聽完班議員「為民請命」，小弟就覺得好笑。因份工真係好易做，大聲嗌，嗌到聲嘶力竭，就有人叫好，多幾張選票！其實，理性角度分析，邊會有又要馬兒好，又要馬兒不吃草㗎？一方面，要保證供電效率百分百，絕不停電，另一方面，要求環保，減碳排放，大量投資改善機組，增加天然氣發電。咁，唔加少少電費點掂呀？
不過，大家角色不同，市民是消費者，議員要「為民請命」，壓你收費，政府則夾在中間，明知兩電生意冇競爭，欠缺「武器」可以嚇窒兩電，唯有希望大家生生性性，一人行一步。所以，每年兩電上立法會，都只是「嘈嘈閉」做過場表演，冇事，然後，再各自在形象上做工夫。
這方面，中電擺明優勝，因有殿堂級公關莊偉茵坐鎮，未上立法會之前，已率先公布一個「中電消費券計畫」，預先Offset即將被議員鋤到飛起的負面效應。
其實，消費券計畫，所費不多，但到位。因主要針對貧苦家庭及草根長者等。這方面，與議員目標一樣，針對為弱勢社群，贏晒。
另外，有招更高，為掟二千萬元出來推行「節能設備升級計畫」。即係點？即教客戶慳電，幫襯自己少啲，問你服未？
至於港燈，似乎在提升關懷社會，為客人着想方面冇乜做嘢。看台公論，輸兩個馬位。
曾智華
阿碌開咪
中電有殿堂級公關莊偉茵(右)坐鎮，未上立法會之前，已率先公布一個「中電消費券計畫」。資料圖片
最Hit
更多文章
