【阿碌開咪】最佳新聞圖片
《名家合集》收錄名人文章，分享觀點，探討時事。
2020-11-04 10:50 HKT
字體大小
十一月，昔日做香港電台時，這段日子，各組同事已忙到飛起，因要準備年底推出各自的大製作，綜藝籌辦《十大中文金曲頒獎禮》，新聞部準備《十大本地及國際新聞》，公共事務組則搞《聲音檔案選舉》。
報章行家又如何？當然也選「十大新聞」，兼且一定會有《最佳新聞圖片選舉》！
今年，若要小弟選，就投前日《星島日報》的A1相片啦。標題為《五月內會會議衝主席台釀肢體衝突，警拘泛民七人，控違立會特權法》。
配合呢個震撼性標題，老編選咗幅當日大混亂高潮一刻相片。
上世紀八十年代前，認識不少新聞攝記，揸住相機，永遠唔敢亂撳，多數睇準後才按下快門，因為當時用菲林，好鬼貴也！後來相機電子化，班大哥開心到飛起，因從此可以無限量亂撳，再回報館慢慢揀，一定會有精采作品見報。
呢呢，前日本報頭版一幅，正是整場大混亂中，最具神韻、有趣、生動的一刻。相片，遠比睇片精采，因只停在一格，大家可慢慢欣賞當時的「群營亂舞」。
相片之內，可以見到建制派、泛民及立法會保安的分工，其實早有角色及默契。
建制派及保安負責將李慧琼重重包圍，以達至正式開會格局，使其有合法性。
好，建制議員既然早有角色，就要睇睇邊個積極、邊個過火、邊個Hea Hea下側側膊、邊個「發台瘟」嘞。
相片所見，最投入、最享受、最High，一定是何君堯，佢一邊演出，一邊自拍又他拍，久不久更擺出撩交打姿態，但全程笑得開懷。咁，最一嚿雲的，係邊個？正是經常開會瞓着，瞓到側晒身（聽講間中流口水）的「大象哥」黃定光，佢只呆呆地雙臂握拳自己護胸站台前，但眼神飄浮，好似唔多清楚搞緊乜。
整場「鬧劇」，好明顯，立法會保安唔多想介入（因議員擺明在做「騷」 ），故只企在既定的位置睇戲。
一幅相片有一百個故事，肯定是今年「最佳新聞相片」！
曾智華
阿碌開咪
最Hit
更多文章
