【阿碌開咪】四大難題拗到天光再變天黑

名家合集

《名家合集》收錄名人文章，分享觀點，探討時事。

2020-10-28 09:01 HKT

時評專欄

內容

全世界文明城市掌權者，個個想「特朗普」上身，因「狂特」一上任就將權力用盡，亂簽行政命令。凡有權的，皆用盡，懶理反對聲音，不游說，不扮聆聽意見。

好處是事事快速，絕不會拖泥帶水。唔好處是政策未經反覆辯論再醞釀，經常撞板，得罪各山頭，搞到自己極之乞人（部分美國人）憎，再選下任總統時，大量選民誓要——Anyone But Trump！

任何社會，要推行一項爭議性政策皆極難，因持份者眾多，利益不同。若政府硬來，必定先遇民意反對，再來司法覆核，大部分人唔服的話，必搞到雞犬不寧，無法推行。

香港過去半世紀，有四大問題，屆屆政府都想研究、想落實，結果永遠有這樣那樣原因，胎死腹中，得個拗字。

嘻嘻嘻，當然並非全民普選啦。問心，由港英政府開始，邊有一屆政府想認真落實普選？

但電子道路收費、消費稅、大型填海及侮辱公職人員罪，則N屆政府都想推。

一、電子道路收費。死在兩大阻力，首先，香港人從來強調私隱，絕對唔想畀人知自己幾時去過邊（其實絕對自己呃自己，全港皆天眼，你走得去邊）。再者，社會講公平。若有錢畀路費就可以入中環，嗰區就變成有錢佬專用區，窮人冇得用！個個司機牌費則都畀咁多喎（又係攞來講，過隧道都要畀錢啦吓嘛！尤其西隧，邊個想快，咪畀多啲錢囉）！

二、消費稅。零售商、消費者一定嘈到拆天，誓死反對，因無情情加重負擔，兼且大家納同樣的消費稅，會導致貧富不均更嚴重。

三、大型填海。林鄭看似想硬闖，但肯定佢任期完都無法在立法會扑槌，因反對聲太大。司法覆核必跟尾，有排打。

四、最新民建聯又倡議侮辱公職人員罪，必定釘釘，因為同時要通過埋「侮辱市民罪」，否則變公務員有特權，市民冇，根本邏輯唔通，辯論輸晒。

四大難題，繼續天光拗到天黑再到天光。

曾智華

阿碌開咪

編按原題為「拗到天光再變天黑」

政府要推行電子道路收費、消費稅勢引起不少討論。