【阿碌開咪】「拍子簿」的「死因」
《名家合集》收錄名人文章，分享觀點，探討時事。
2020-10-06 09:12 HKT
字體大小
上周五本欄標題：《「拍子簿」離職之謎》，刊出當日，圈內人其實已個個知真正原因了，因為西九董事局成員葉傲冬公開將來龍去脈解釋清楚。正是冰封三尺，非一日之寒。
原來栢志高與大部分（除主席唐英年外？）董事局成員積怨甚深，栢總裁被指不尊重一眾董事，經常在小組委員會中互片，又亂花錢（公帑）。結果火星撞地球下，董事會感覺「拍子簿」作為總裁，有失職之嫌，於是聯手密謀炒佢，因大家之間已不存在互信，無法共事。
公職炒人，絕不容易。於是好好醜醜先決定明年八月之後，不再與栢志高續約。但為免太尷尬，於是提出延長一年任期。呢個做法，等於話：「嗱，炒就炒硬嘞，不過，畀番少少面子你，玩多一年啦！」
做慣大官的「拍子簿」心高氣傲，「串」慣班董事。如今畀你班友玩番轉頭？反正早早生活無憂，於是拍案而起，回覆——提早唔玩！
咁，點解唔即刻劈炮，擺明冇眼睇你班友呢？騎騎騎，做過政府工者皆知，公務員或公職人員，有味嘢最精——計福利及計假期。
若小弟冇估錯，「拍子簿」可能已立即唔使返工，先放晒積累的假，舐盡最後福利才正式拜拜去也。
講到栢志高，佢向上冧（擦！）的功架，小弟上周已透露，真係名震官場。不過，向下及向橫又如何？等領教過的日後爆啦。
我粗粗哋見過佢兩次。十幾年前，此君已爬到商務及經濟發展局秘書長之位（當年政府已「錫晒」香港電台！），間中需要來香港電台施施下馬威。理論上，我哋全是佢下屬。呢，咁就杰。串爆的「拍子簿」坐在會議室主席位，黑口黑面，擺晒官威，丁點禮貌都冇。總之，乜都由上而下，萬事冇商量！
本來佢副嘴臉我已全部忘記，就因今次事件，葉傲冬指出此君與西九董事局成員「紮馬」，才重現小弟腦海。
「拍子簿」有此記錄，以後任何公職唔使再預佢矣。
曾智華
阿碌開咪
西九文化區管理局行政總裁栢志高。資料圖片
更多文章
