【阿碌開咪】彪叔咪害李慧琼
《名家合集》收錄名人文章，分享觀點，探討時事。
2020-10-05 08:12 HKT
字體大小
政治大氣候使然，不少電視台新聞部換阿頭，點解？大家心照！如今香港已踏入一個「識做年代」，你唔識做，有自由，夾開食囉。又或自己開個網台，開設Patreon，好似「燒山」蕭若元及沈旭暉咁，粉絲位位每月交十美元，隨時月入幾十萬港元，又有影響力，真真過癮。
Now新聞台請來「無記」退休高層陳鐵彪空降，立時重手「交功課」，懶理內部外部（包括建制派）反對，一於請李慧琼做主持，原因為「通過佢可以請到重量級嘉賓」！
真唔真？當然真！Starry擁有行政會議成員及民建聯主席雙重身分，中央又錫晒，當然人人畀足面。分分鐘堅拒接受香港各大傳媒訪問的中央領導級，也可能亮相。
不過，以香港新聞專業文化看，陳鐵彪咁搞法，對李慧琼未必好，包括：
一、感覺Now偏心，為佢一面倒製造曝光，必引起建制同路及泛民對家抗拒。呢下抗拒，會不知不覺搞到「對人不對事」，諸多針對李慧琼（其實已發生緊）。
二、節目擦鞋味濃。只有Starry搵到而其他人搵唔到的嘉賓，即畀足面佢。如此，李慧琼必心存感激，處處維護處處讚。若被訪者是個掌權人物，呢種訪問形式，必令觀眾反感，覺得冇代市民監察質詢。
三、可能被抗議。李慧琼肯定下年出戰立法會，在此政治尖銳角力環境，一眾對頭人肯定用盡方法，包括各式投訴及法律行動去爭取「公平」，愈近選舉期愈危險。
今勻彪叔的「立功」，可能變成一鑊泡（如今已泡泡哋）。
點拆局呢？簡單，真心又好，扮野又好，應該將訪問主持位開放，個個政黨主席皆有分，個個行政會議成員皆有分（尤其葉劉淑儀，否則不停窒到你飛起），製造一個公平公開形象。然後，低調安排最重磅嘉賓，例如夏寶龍及駱惠寧，就Starry出馬訪問，如此，佢身分地位，自會暗暗提升，效果冇咁核突。
曾智華
李慧琼。資料圖片
最Hit
稻香集團中秋月餅系列 傳統與創新兼備 細味三姐匠心之作
2025-09-09 08:00 HKT
打風？｜酷熱持續達34°C 電腦模型預測下周雙「颱」共舞？進入港800公里範圍
2025-09-09 13:09 HKT
前TVB「金牌惡爺」自爆被騙百萬：前世欠咗佢 狠批富二代演員「玩票性質唔捱得」
2025-09-08 09:00 HKT
更多文章
