【阿碌開咪】賭王、威嚴、搞笑
《名家合集》收錄名人文章，分享觀點，探討時事。
2020-05-28 09:00 HKT
字體大小
賭王何鴻燊終年九十八歲，全港新聞版鋪天蓋地報道，因老何乃香港人及澳門人過去八十年的第一號「集體回憶」人物。前天下午一點賭王病逝消息傳出後，佢旗下兩隻股票，包括信德及澳博皆即時爆升，市場唔會錯，有如此反應，唔……
講起老何，小弟過去曾三次單對單訪問佢，真真非常高度娛樂性，有幾點可以一記的，包括：
一、心態上愛做皇帝。約佢到電台直播訪問前，先上信德中心「皇宮」拜候佢。嘩！布局犀利！首先，門外坐滿不同國籍人，一睇就知屬賭王旗下全球行政人員，輪流等召見。之前，大家要乖乖坐定定，一個又一個晉見。到我時，但覺辦公室設計就似皇宮，賭王坐中央，有不少威猛風水擺設，而佢，面容百分百威嚴！
二、尊重元配。第一屆《澳門小姐競選》，由小弟夥拍楊振耀、胡慧中及惠英紅做主持。直播中，賭王不停指令改程序，因很希望病重的元配能出席做加冕主禮。只要元配能/肯到現場，全部阿二、三、四，都要借歪！
三、話明要第一，要贏。可能生於大家族而被家族中人排斥，加上屬「西洋仔」（非白人的歐洲人），受港英政府「歧視」，所以，要威要贏要光宗耀祖的心非常強。接受訪問時，聲明自己字典內，沒有「輸」這個字，一生都要做No.1，所以，車牌也要是HK1！邊個阻住佢做第一，必定「遇神殺神，遇佛殺佛」。
四、港澳棟篤笑鼻祖。何鴻燊除要做No.1外，在非工作範圍，也要吸盡眾人的目光。佢天生娛樂細胞滿身——跳、唱皆精外，每個新年大型晚會中，自製高潮，用當年的生肖來做棟篤笑，自寫自講，笑刺肚皮，幽默感爆表。每次皆由專業人員錄下片段，傳給港澳新聞界，以便在媒介發放。
何鴻燊靚仔、精明、富有、玩得、口才出眾，幾乎所有吸引異性的條件集於一身，所以，異性緣無人能及。煩惱又如何？暫時冇乜人知！
曾智華
賭王何鴻燊。資料圖片
更多文章
