港車北上｜電動車如何部署？港版中國版充電標準不同附1簡單方法即解決兼容難題

更新時間：15:08 2023-05-03
發佈時間：15:08 2023-05-03

自去年年底政府公佈將於今年開放「港車北上」後，一直有好多電動車車主詢問駕車入到中國會點樣、充電又會唔會唔兼容等。到底電動車揸車北上可唔可行？

政府宣佈「港車北上」會在六月一日起接受申請。資料圖片

咩係「港車北上」？

廣東省政府喺去年十二月二十日公布「港珠澳大橋（大橋）港車北上不設配額計劃」（「港車北上」計劃），允許合資格的香港私家車可在無須取得常規配額下，經大橋往來香港同廣東省，便利香港居民以自駕的方式到廣東省作短期商務、探親或旅遊。今年五月一日正式宣佈，六月一日上午九時開始接受合資格香港私家車申請，並於七月一日零時起開始畀已獲批的香港私家車經港珠澳大橋口岸往來香港同廣東省。

電動車港車北上｜國標充電標準

有閱讀過之前充電標準大不同呢篇文章的車主們應該都知道中國在 2015 年公佈 GB/T 2015 標準（新國標），為直流及交流電訂立一個基本上只有中國電動車會用的標準。其交流電標準基本上就係一個公母調轉的 Type 2（歐洲標準），而直流標準就近似一個排位不同的 CHAdeMO （日本標準）。以 Tesla 為例，中國巿場售賣的版本配備兩個充電口設計，並設有防呆設計，防止同時插入 AC / DC 兩枝充電槍。

Tesla Model 3/Y 中國版充電口（圖片來源：EVOffer HK）

Tesla Model S/X 中國版充電口（圖片來源：EVOffer HK）

電動車港車北上｜標準唔同，點算好？有無轉接器？

承上文，充電標準可分為交流（AC）及直流（DC），香港大部份電動車均採用 Type 1 （Nissan）及 Type 2 （Audi, BMW, Hyundai, Kia, Mercedes Benz, Tesla, etc.）作為 AC 充電標準、CHAdeMO（Nissan）及 CCS2（Audi, BMW, Hyundai, Kia, Mercedes Benz, Tesla, etc.）作為 DC 充電標準。詳細講解可閱讀充電標準大不同。

交流電技術上比較簡單，有大量充電轉接器配件

目前巿面上有大量充電轉接器配件可供歐標（Type 2）或美標（Type 1）電動車使用：

模式	車端	牆端	線端	電流	用途	相關產品
Mode 3	Type 1	/	GB/T AC	交流	充電器帶線，只需將充電線接上此轉接器使用
Mode 3	Type 2	/	GB/T AC	交流	充電器帶線，只需將充電線接上此轉接器使用	Duosida

節錄自「充電標準大不同」

由於大部份收費國標充電器均已自帶充電線，基本上一個 GB/T to Type 2 AC 轉接器即可於中國境內使用大部份交流電充電設施。

中國內地大部份充電器已自帶充電線，只需要將轉接器接駁充電線，再接駁電動車，即可充電（圖片來源：EVOffer HK）

直流電技術較為複雜，技術含量高令轉接器價格高昂

由於直流電有較多充電器與車輛之間的數據傳輸，技術上會比交流電轉接器更加複雜。2017 年或之前，中國 Tesla 同香港及其他亞洲地區一樣，採用歐洲標準。後來因應中國規範所有在國內銷售既電動車均需採用國標 GB/T 標準，中國 Tesla 推出一款GB/T DC to Type 2 DC 既轉接器，並免費送比所有 Model S/X 國內車主，而單獨售賣價錢為 2,750 CNY（香港 Tesla 亦曾經在香港發售，售價為 3,127 HKD）。

車端	牆端	線端	電流	用途	相關產品
Mode 4	Type 2 DC	/	GB/T DC	直流	充電器帶線，只需將充電線接上此轉接器使用（只適用於 2020 年或之前 Model S/X）	Tesla

節錄自「充電標準大不同」

Tesla Model S/X 專用 GB 直流充電適配器（圖片來源：EVOffer HK）

截稿時為 2023 年 3 月，中港兩地 Tesla 似乎已經停售這款充電轉接器，官方網店及淘寶旗艦店均已將本產品下架，有車主嘗試聯絡中港兩地 Tesla Service Center，成功訂貨，有需要的 Model S/X 車主可以一試。

由於舊版 Tesla Model S/X 採用 Type 2 DC 而非現時 Model 3/Y 及其他本港主流電動車的 CCS2 標準，以上充電轉插器並不適用於所有配備 CCS2 既電動車。

你係咪呃我架？我網上見過有隻 CCS2 轉 GB/T 既轉插器架喎！

售價逾萬元的 CCS2 to GB/T DC Adapter（圖片來源：EVOffer HK）

以上呢一款其實係適用於使用國標充電口的國內電動車出口至海外時使用 CCS2 充電器既產品，啱啱好同我們的 Use Case 調返轉。我地在過去三年都有同呢方面的專家交流過，近日終於漸露曙光，產品將於今年 5 月進行測試，有望趕及 7 月港車北上開通前出貨！

電動車港車北上｜將 Tesla 駛至國內，可以正常使用所有功能嗎？

香港版及中國版 Tesla 系統其實有好多唔一樣的地方，所以港版車其實受到好多限制。首先，香港被禁用的功能唔會在進入中國內地境內之後自動解禁。由於軟件及地圖資料庫雙重限制，瀏覽器、召喚等香港 Tesla 沒有的十個功能都不會被解禁。

其次，由於香港使用 Google 地圖，而 Google 地圖在中國並不能使用，車主一駛過境地圖界面就會變成全白，並顯示地圖被禁用等資料。截至 2023 年 5 月，經過多位車主實測，目前 Tesla 內置 SIM 卡支援中港漫遊，駛入中國境內亦可正常使用手機 App 及 Spotify。最困擾的地方是部份 Tesla Supercharger 設有地鎖，需要在 Tesla 屏幕上揀選返該充電站先可以睇到地鎖密碼，而香港車係睇唔到這項資料，只可以打電話畀當地的 Tesla 熱線查詢或使用第三方軟件（例如小特）開鎖。

差啲唔記得講，由於中國大陸並無 Autopilot 限制，香港 Tesla 入境中國大陸之後，所有道路（只要認到地下劃線標記）均可使用 Autopilot。

《2022影響力報告》：https://bit.ly/3naFb9B　資料來源：Tesla

電動車港車北上｜我可唔可以喺廣東省既 Tesla 服務中心維修？

疫情前，國內的 Tesla 維修中心是願意幫跨境既港澳 Tesla 進行維修，不過會當作沒有保養處理，車主需自行付費。有長期在國內的車主分享，中國的維修中心曾經在疫情期間免費為滯留境內的港澳 Tesla 免費提供維修服務，未知呢一項政策係唔係永久執行，需要車友們提供更多資料。

電動車港車北上｜總結

總括而言，如果你在國內會逗留一段時間，可以在夜晚搵個停車場過夜中叉的話，只要買條 Duosida GB/T to Type 2 轉接器就可以用到幾乎所有中叉充電站，駕駛電動車北上都尚算 OK。但如果要即日來回或者要揸得比較長途，暫時只有 Tesla Model S/X 可以用到快充，其他電動車會相對比較不方便，敬請期待即將推出既 GB/T DC to CCS2 轉接器。

（本文獲「EVOffer HK」授權轉載，並加上原文網址鏈接）