葵芳邨雙屍｜同事聞噩耗傷心難過憶女死者生前「提到個仔都開心」

更新時間：13:11 2024-05-14
發佈時間：13:11 2024-05-14

家住葵芳邨的城巴59歲姓黃女站長，疑因患心臟病擔心無力照顧32歲中度智障的兒子，在母親節（12日）留遺書攬同愛兒於葵仁樓寓所內燒炭，共赴黃泉。同事們聞噩耗均感傷心難過，形容黃女生前為人樂觀勤奮，每當「提到個仔都開心」，萬料不到會發生悲劇，「疫情捱過咗，心臟做咗搭橋手術，都捱過咗」，大歎惋惜和無奈。

黃女生前任職城巴站長，駐北角總站，工作超過25年，同事們都暱稱她「Can姐」。由99年入職便認識黃女的車長同事趙先生，直言昨晚深夜收到噩耗感到很突然，「自己返到屋企喊咗成晚，今日都攞咗假要休息」；其他很多同事亦表現傷心，「話就話冇嘢，但大家男人，點會講出嚟吖」。

他形容黃女「在公在私都係好媽咪、好朋友」，並憶述對黃女最難忘的印象是她工作有能力、勤奮且盡責，尤其是當過往遇上社運或打風等混亂日子，「佢做一個女人仔，出面立立亂，佢控制到啲車班次，控制到啲車長點做嘢，畀起第二個人真係亂晒」，令人佩服。

同樣與黃女共事逾25年的車長李先生，對發生悲劇亦表示難過，「一定唔開心嘅，始終咁多年同事」、「都瞓唔着，晏晝想食嘢，唔開心都食唔落」。據知黃女生前患有心臟病，兒子患中度智障，但李車長指黃女生前為人樂觀積極，更沒有介懷愛兒的問題，直指她「湊住個仔都30幾年啦」，「提到個仔都開心嘅」。李車長懷疑黃女日常較少與其他人傾談心底話，歎謂：「疫情捱過咗，心臟做咗搭橋手術，都捱過咗，點解最後諗唔通」，以致因一念之差發生悲劇。

另一名姓潘女車長亦提及黃女生前為人開朗，樂於助人，喜歡烹飪及旅遊，曾經帶糖水食品返總站與同事分享；去年3月亦一起到內地旅遊，可惜因為要照顧兒子不能遠行太久。