KellyChu - 周大福全運會獎牌放閃 1︰30「巨牌」任打卡 | Executive日記

專欄

更新時間：02:00 2025-10-10 HKT
發佈時間：02:00 2025-10-10 HKT

全運會下個月開鑼，香港除咗係賽事承辦城市之一，本港著名珠寶品牌更成為獎牌嘅獨家供應商。為迎接呢項盛事，周大福珠寶集團昨天起喺啟德零售館舉行展覽，首次展出3款全運會獎牌，又設置1︰30超巨型獎牌裝置，畀市民沉浸式打卡。同場仲可以玩劍擊遊戲，一嘗做劍手嘅感覺；展期至11月21日。

　　第15屆全運會競賽同群眾項目獎牌名為「同心躍」，代表粵港澳三地同心協力，共躍未來。周大福珠寶集團創作總經理兼第15屆全運會獎牌總設計師林鴻勝話，獎牌以中華白海豚為原型嘅吉祥物「喜洋洋」為主，又有寓意珠江、香江、濠江三江匯合嘅環狀水紋。由水紋組成嘅莫比烏斯環，仲隱藏咗數字「15」，同第15屆全運會呼應。

　　獎牌另一面圍邊有66道刻紋，致敬全運會66年歷史；競賽項目獎牌更用咗「三花映牡丹」概念，喺由粵、港、澳三地禮花組成嘅會徽下，加上牡丹，象徵大灣區背靠祖國，共同繁榮發展。獎牌綬帶扣就採用「同心結」設計，靈感嚟自港珠澳大橋。

　　至於第12屆殘特奧獎牌「同心暖」，首次用盲文技術，令視障運動員都可以觸摸榮譽；獎牌綬帶扣則以嶺南傳統建築文化「鑊耳屋」做靈感。

　　林鴻勝話，今次設計工作係「國家級任務」，前後製作十幾個修改版本，希望獎牌可承載全運會歷史、中國文化同大灣區特色，讓運動員拎到獎牌時有榮耀感。

KellyChu