73歲「靚聲王」張偉文 驚傳入ICU
發佈時間：03:00 2025-05-02 HKT
73歲「靚聲王」張偉文近年身體狀況大不如前，除腰患困擾要坐輪椅代步，近年更患上認知障礙症，所以長居護老院，幸得徒弟方俊照顧，見證人間有愛。《星島頭條》收到獨家消息，張偉文已留院多天，病情嚴重，圈中亦傳出他入住ICU，記者在醫院守候，傍晚探病時間，張偉文經理人方俊現身探病，他承認張偉文細菌入血，不停發高燒、病情嚴重，醫生指他已無藥可醫，要靠自己去努力「打仗」。
面容憔悴的方俊手挽探病食物到醫院，見到本報記者時都一臉驚訝，他談到張偉文病情時憂心忡忡，指院方安排他住在隔離特殊感染病的負壓病房，更需要特別護理。由張偉文最近相片中可見他雙目無神、眼皮下垂，頭髮及鬚根都變白，而且暴瘦20磅、得返130磅，連面都尖埋。
反覆入院6、7次
方俊透露張偉文3年兩度「中招」後，身體變差，去年冬至生日時左腳劇痛已被送院，幸而沒有大礙。直至4個月前尾龍骨位置開始有壓瘡，入過院後未見有好轉，近兩個月壓瘡更開始惡化，變得越來越大，有拳頭咁大兼且含膿，他就帶張偉文睇私家專科醫生，種菌發現感染了兩種細菌，可惜服用多次抗生素療程後未見有改善，醫生指已有抗藥性，連他都束手無策、無藥可醫，只能keep住洗傷口。由於壓瘡深到見骨，醫生建議盡快送往急症室最安全，故當日方俊安排張偉文乘坐輪椅的士，自行到醫院急症室，分流等足12小時，至凌晨4時才上到病房，醫生指張偉文有嚴重壓瘡，同樣說無藥可醫，只能靠每日清洗傷口，住了幾日就安排他出院回老人院舍洗傷口。但張偉文出院後，因為細菌入血不停發高燒，期間無限輪迴入院，退燒後又再出院，來來回回進出醫院6、7次，最慘是移動到傷口時令他痛苦狂叫。
精神紊亂難進食
直至兩周前張偉文情況再轉差，今次入院獲院方安排入住負壓病房，方俊無奈說：「呢次偉文變得精神紊亂，食唔到嘢，唔肯張開眼，拍佢都冇乜反應，因為唔肯食嘢急劇暴瘦20磅，而且壓瘡喺尾龍骨位，坐又坐唔到，個人憔悴到不得了，仲要綁住手吊葡萄糖……醫生話細菌入血有生命危險，隨時可以好差，畀定心理準備叫我聯絡佢親友，通知佢哋盡快見下面……」
不過方俊並沒放棄照顧張偉文，除咗煲石崇魚外，近日每天都去街市買雞燉雞汁，再加入節瓜來補充營養：「𠵱家佢肯講返一兩句說話，加上住喺負壓病房，咁我都安心少少，不過𠵱家醫生又叫佢轉去療養院，佢病情都未穩定，血液入面仲有細菌，我梗係反對啦，仲喺度爭取中。」對於張偉文未過危險期，方俊愛莫能助感到無奈：「唔想見朋友咁痛苦受煎熬，好心痛，佢做人點解咁苦？我都好唔開胃，瘦咗20磅……」
