關志康 - 金卡黑卡白卡無卡 | 神耆商機

專欄

更新時間：02:00 2025-02-17 HKT
發佈時間：02:00 2025-02-17 HKT

　　「記得90年代，拎張『金卡』出來埋單真係威，就連服務員都會對你另眼相看！」有幾位老前輩聚會時提起，談及現今的付款模式，大家都不禁懷念起香港90年代的「金卡」光輝歲月。有朋友回憶道：「以前我有第一張信用卡已經覺得好巴閉，『金卡』更是高級到遙不可及。」

　　隨着時代變遷，銀行降低了發卡門檻，「金卡」以至「白金卡」都已變成「過氣」的噱頭。即使是「只限受邀人士」的「黑卡」，如今也不再那麼神秘。有老闆不屑地說：「『黑卡』持卡人係咩群體？你加入FB群組就知啦。年費兩萬，你想要？我推薦你便可。」「黑卡」既是金屬卡，曾經也是身份的象徵，但如今大家都用手機付款，「標籤效應」逐漸淡化。袋住張金屬實體卡，反而覺得重而無當。

　　有位退休銀行家附和稱：「如果要展現身份地位，馬會信用卡可能更實際。『銀卡』代表你是全費會員，全香港僅得16400人。不過，大多數香港人都講求實際，免年費、加積分優惠先留得住客！」另一位長者更直白：「呢個時勢『現金為王』，用現金先係身份象徵。賺現金、使現金、免納稅先係真正嘅贏家。」有位坐輪椅的老闆戲謔道：「有黑卡好叻咩？我有『白卡（殘疾人士登記證）』！我嘅福利同權益，你享受到咩？」

　　真正的富豪根本不需信用卡，因為好少會親自埋單。一位超級富豪直言：「我好少『簽卡』，提款卡更加十幾廿年無用過。出去食飯，一係有人請，一係我啲『伙記』會搞掂，又或者司機會打點好。食完起身就走啦，仲要遞張單畀我簽卡？好冇面囉。」

健康教育基金會主席
關志康

↓立即下載星島頭條App↓