頭條戲場 - 《美國隊長4：勇敢新世界》福伯先至係主角 | 頭條戲場

專欄

更新時間：02:00 2025-02-17 HKT
發佈時間：02:00 2025-02-17 HKT

前幾年漫威電影人事大混亂，爭權奪利之下搞到劇本唔掂，特效唔得，未能達到「爽片」要求，觀眾都患上「超級英雄電影疲勞症」；剛剛公映的《美國隊長4：勇敢新世界》（Captain America：Brave New World）是漫威重整旗鼓之作，水平不俗，睇到誠意。

安東尼麥奇接替基斯伊雲斯，做「新任美國隊長」，壓力梗係大啦，黑人、沒有打血清、非超級士兵。「新美隊」的武力未算頂級，有性格缺陷，優柔寡斷，成日懷疑自己︰「我未夠班……」未去到精神領袖那種意識形態，有排浸，而他那種勇敢最後亦搞到一鑊粥，不過你又嬲佢唔落。

只有一段片尾片段

　　82歲的夏里遜福有兩個身份，一是現任美國總統，一是「紅浩克」（不叫「俠醫」，因其行為跟這二字扯不上關係）。此人物一開始創作就是影射特朗普，在特朗普再次崛起下，本片重修劇本又補拍，令這位剛愎自用的總統展現懦弱一面，世界領袖都要面對普通人要面對的家庭問題、生老病死問題，同時令「紅浩克」的登場變得合情合理。本片食正政治潮流，筆者最近重睇/重聽JFK遇刺案的來龍去脈，戲中就有講刺殺、mind control，啱我。情節不怎麼驚天地泣鬼神，叫做小心翼翼，穩穩陣陣打頭陣，大橋段是重塑世界秩序咪搞分化，電腦特效回復正常。至於其他人物，有神劇《絕命毒師》的「炸雞佬」Giancarlo Esposito，飾演毒蛇會首腦「響尾蛇」，「黑寡婦」的接班人由身高150cm的Shira Haas擔任。另有一段片尾片段。溫馨提示︰睇過電影《永恆族》、連續劇《飛隼與寒冬戰士》，會對角色關係容易理解一點，Tim Blake Nelson扮演非常關鍵的細胞生物學博士，他出場時我都要load一load，佢上次出現是在2008年的電影《新變形俠醫》。

頭條戲場

↓立即下載星島頭條App↓