KellyChu - 消防處2025月曆出爐猛男「show肌」勁吸睛顯專業本色 | Executive日記

專欄

更新時間：02:00 2024-12-06 HKT
發佈時間：02:00 2024-12-06 HKT

消防處2025年月曆出爐喇！Kelly就得知，今次月曆照片大突破，最吸睛係有4位消防及救護猛男「show肌」，分別手持唔同救援工具，盡顯專業本色。相信唔少人都想問，到底點先攞到呢本咁特別嘅月曆，記得留意消防處稍後公布喇！

　　今次消防處月曆以「救災扶危　為民解困」嘅使命為主題，月曆1至12月份各附唔同照片，有人、有車，取材自該處3個職系嘅工作日常，凸顯消防、救護和調派及通訊課人員時刻緊密合作，喺滅火、院前救護服務和調配資源方面各司其職，竭力守護市民生命安全。

　　其中幾張猛男圖分外醒神，例如1月、7月及9月份嘅照片，由消防職系人員親身上陣，3月主角係救護職系人員，佢哋勤練體魄，上半身「show肌」大搶眼球，係力嘅表現。

　　大家都要留意，4人各手持或攜帶消防救護工具，包括屬獨立便攜式呼吸防護裝備的呼吸器，可供應獨立嘅呼吸空氣，保護佩戴者呼吸氣道免受災場嘅濃煙、燃燒所產生嘅有害物質、毒氣等危害；平滑堅硬嘅長脊椎板，用作承托懷疑脊椎受傷嘅傷者；及威力強大嘅可馬陶快速爆破器，配合萬能剪機/積躉使用可進行切割、拖拉、起重及爆破等工作，睇完真係長知識。

　　值得一提，近年消防不時出動拯救貓狗，5月嘅照片，係1名女職員抱着同事飼養嘅精靈貓貓留影，倍見溫馨！

KellyChu