直認對方為最多身體接觸拍檔陳瀅周嘉洛無懼緋聞望再合作

頭條日報-娛樂

更新時間：00:00 2022-08-31 HKT
發佈時間：00:00 2022-08-31 HKT

陳瀅跟周嘉洛這對緋聞情侶，最近「定情作」《痞子殿下》推出，緋聞再被炒熱，嘉洛更被拍到單拖到陳瀅香閨，雖然事後兩人否認戀情，但講明唔介意繼續被緋聞纏身，更認為會有助劇集宣傳。兩人仲自爆對方為最多身體接觸的拍檔，仲話好想該劇開續集，大家繼續合作。採訪：杜杜攝影：朱偉彥
服裝：Harvey Nichols Hong Kong（嘉洛）

對於緋聞愈傳愈烈，有豐富經驗的陳瀅冇有怕，「由佢啦！做得呢行仲要係單身就容易啲惹嘅。」嘉洛就繼續口花花，「單身唔夠，仲要靚！」兩人都承認有晒心理準備，《痞子》播出會好唔得閒，「我哋又冇為咗呢件事覺得大壓力或者唔開心，我哋都係咁出去食飯，照一班人出去，同埋啲人接受我哋就會容易鍾意『紀威』同『蠻儀』，我哋都好鍾意呢兩個角色。」
諗好晒續集故事

兩人又自爆對方是合作對手當中最多親密接觸，陳瀅強調：「得意嘅唔係情欲浪漫嘅。」嘉洛仲話：「我哋嘅親熱，好多時係嚟自暴力嘅出發點，有個情況係我哋爬緊隧道，但係佢嗰時係盲咗，爬得快就不停頂到我屁股。」陳瀅點晒頭話：「其實咁樣係好親密，我都未試過咁樣頂一個男仔。」嘉洛再補充：「我都唔用親密去形容，親密係甜得滯，我覺得係有啲核突，我都戥佢慘，我係好尷尬，我收（股肌）又唔係，唔收又唔係。」嘉洛坦承第一個反應是想屁股加墊，但太厚又起角會好怪，最終放棄，但承認這場戲相比起在張頴康面前露股出浴戲更尷尬，「始終有接觸，佢又係女仔，同埋嗰場戲其實我係遮晒，唔會有人睇到小嘉洛。」他又表示露股戲已接近底線，但若有機會拍《色戒》這類題材呢？他笑言：「我去到佢嗰個級數都唔介意，但係暫時未有，要修練吓先。」

連緋聞都唔怕，又跟JW（王灝兒）和朱敏瀚等對手合作得開心，兩人透露已跟監製傾開續集，「我哋已經諗好晒故事，一步步嚟，《痞子2》做咗民初先，受歡迎再做現代版。」當然，最後都要睇今輯觀眾反應啦！