《大叔》搵到錢明年「破處」交稅練美娟聖誕想呃男仔去飲酒

頭條日報-娛樂

更新時間：00:00 2021-12-10 HKT
發佈時間：00:00 2021-12-10 HKT

　　31歲的練美娟(娟姐)自《大叔的愛》後人起急升，工作量倍增，聖誕節黃金檔期搵得特別多，坦言工作量係入行最多嘅一年。娟姐更自爆以往嘅收入，一直去唔到交稅嘅要求，但明年相信要「破處」。問到如何運用第一桶金？她搞笑回應：「用嚟投資喺男人身上，或者趁聖誕節呃佢哋飲酒。」
採訪：方騫平攝影：沈健程　服裝：Why Not?　場地：太古城中心
　　娟姐坦言今個聖誕節多勞多得，今年埋數有6位數字進帳，收入非常唔錯：「以前收入一般，咁多年嚟都唔使交稅就知啦！」她自言天生「婆仔」性格，唔會請人食飯，嗜好係儲蓄，最大目標買「姑婆屋」。
同肥仔處於冷靜期
　　對於七仙羽曾爆ERROR成員肥仔(梁業)一早吼住練美娟，問她會否約會肥仔共度聖誕佳節？她哈哈大笑說：「我哋啱啱先做完夫妻(劇中)，怕佢太投入，所以要有冷靜期，而且大時大節想同一班朋友一齊熱鬧啲。」之前娟姐大膽發表18歲失身言論，被追問係咪發生喺聖誕節？她裝傻說：「10幾年前嘅事都唔記得咗，我經理人望住我喇，但都要提醒返唔止係少女，就算少男都會怕蝕底，喺呢啲節日要小心啲，哈！我都好想呃到男仔去陪我飲酒，希望願者上釣啦！不過對象要係敦厚型，唔好畀佢呃返我轉頭。」