今日驚蟄打小人港人冀打走新冠病毒

港聞

更新時間：09:08 2021-03-05 HKT
發佈時間：07:45 2021-03-05 HKT

今日驚蟄打小人，港人最想打走嘅係新冠肺炎病毒。

今日驚蟄，係農曆二十四節氣嘅第三個節氣，灣仔鵝頸橋又會熱鬧起嚟，啪、啪、啪，打小人之聲四起。喺鵝頸橋底嘅打小人持牌人紅姑話，近期有人嚟要求打新冠肺炎病毒，希望用拖鞋底打走呢隻衰嘢，令香港人嘅正常生活快啲回復正常喎。人同此心，唔該紅姑大力啲打落去。

有多年打小人經驗嘅紅姑話，以往多數係女士嚟幫襯打小人，多數涉及感情事，要求打老公嘅小三，但近一、兩年經濟唔好，多咗人要求打小人、保就業，即係想公司裏面啲小人絕跡，令自身工作安穩啲。近排最新嘅打小人目標，就係新冠肺炎病毒嘞，有人專程嚟要求紅姑狠狠咁打隻病毒，求打走佢，香港經濟快啲好番，世界回復平靜，小妹都希望係咁就好啦。

講到生意，紅姑話過去一年幾無咗遊客，生意淡薄，平日甚至「食蛋」，但驚蟄係旺日，佢預咗今日打小人打到通宵。

農曆驚蟄，意味春天時節開始，天氣將會明顯變暖。天文台就預測，今日大致多雲，有幾陣雨，稍後有薄霧，氣溫介乎二十度至二十四度。