《演鬥聽》捧人構思來自曾志偉王梓軒睇C君頭求添食

頭條日報-娛樂

更新時間：04:19 2021-10-15 HKT
發佈時間：00:00 2021-10-15 HKT

　　TVB節目《演鬥聽》將於11月13日播出最後一集，而當晚播映時間會提早至晚上10時，更請到20位音樂人及歌手如王菀之、吳業坤、趙慧珊、施匡翹等撐場。雖然節目一直被視為走偏鋒，但口碑唔錯，更被形容係有質素嘅節目，第一季完結，王梓軒坦言好不捨，期待將來再玩過。
採訪：方騫平攝影：葉君海服裝：K-Swiss、Palladium
　　身兼節目主持人兼音樂總監嘅王梓軒提到節目的由來，因為幾年前喺演藝人協會同曾志偉傾開，大家都想搞個帶有刺激性嘅音樂節目，畀一班有才華嘅音樂人喺冇壓力下發揮才華。
　　為咗向曾志偉交代，王梓軒瞓晒身，每次花十幾小時錄影一集，仲會度埋節目內容。他笑說：「藝人面對輿論及花邊新聞，最慘係冇渠道解釋，透過音樂及唱歌，大家會聽得入耳，識聽嘅亦會搵到答案，所以我哋會喺嘉賓身上加入番啲好玩嘅素材，好似鄭俊弘講番創作《火車未到站》係因為忘記拉拉鏈；《刀削面》胡鴻鈞又畀鄭嘉嘉追問有冇整過容。」問到可有想過開第二輯或將節目變成一個show？梓軒恨到出口說：「我哋成班都係玩開演唱會嘅梗係恨開Show啦！而農夫嘅C君（鄭詩君）好鍾意個節目，成日話撐但又冇時間上嚟做嘉賓，o依家佢『升呢』J2台創意總監，我就靠呢位高層撐我開新一輯節目啦！」