被後生女圍住讚 71歲鼎爺興奮熊抱吳嘉熙

頭條日報-娛樂

更新時間：04:19 2017-01-26 HKT
發佈時間：00:00 2017-01-26 HKT

在《阿爺廚房》中廚藝技驚四座的李家鼎(鼎爺)人氣爆燈，連TVB喺大年初二J2台播出嘅賀年特輯亦搵鼎爺示範幾道傳統賀年菜，在場嘉賓Super Girls(SG)、陳詩欣都讚口不絕，仲封埋鼎爺做偶像。71歲鼎爺強調就算俾女圍都無動於衷，但最終被靚女追捧到笑晒口把持唔住，仲主動同SG成員吳嘉熙（Cheronna）大玩《人鬼情未了》齊齊揸鑊鏟兼攬住影相，搞到全場嘩嘩聲，拍爛手掌。
鼎爺當晚煮咗芝麻雞、紅燒素翅、錦滷雲吞及撈起等(用海蜇頭代替生魚片)，由切料到斬雞，煎炒煮炸由他一手包辦，他更自備磨刀石去磨刀，鏡頭以外鼎爺不時爆粗，但十分認真兼落力。做撈起時邊切嘢邊爆粗咿咿哦哦：「撈唔起就XXX了！」仲大大聲提示工作人員：「滾油行開！」
又愛又驚
對於鼎爺惡形惡相，SG又愛又驚。Cheronna話：「第一次同佢接觸，好似見偶像咁，佢好Man好有霸氣，煮食又叻，好吸引呀。因為我懶，所以要跟鼎爺學功夫保護自己！」隊長Aka指鼎爺完全表現咗鐵漢柔情一面，好有安全感：「覺得佢好細心好溫柔。」Yanny卻細細聲說：「但我驚呀，唔敢亂講嘢。」而Jessica就話：「其實佢個樣有啲惡，但講解煮食步驟好詳細。」Heidi則說：「希望跟鼎爺學到一手好廚藝日後煮畀老公食。」
問到71歲李家鼎被女圍有乜感覺？他哈哈大笑說：「我生不逢時呀，其實我後生都好多女圍，但自己從來冇追女，我唔識追女仔同搵錢，可能自己夠直得女友歡心，對住女仔扮晒紳士太假，我做唔到。」鼎爺仲話唔搞「爺孫戀」，「父女戀」：「雖然有心有力，但冇可能，有陣時都要顧埋對方感受，第三者睇落去好肉酸。」

採訪：方騫平