被后生女围住赞 71岁鼎爷兴奋熊抱吴嘉熙

头条日报-娱乐

更新时间：04:19 2017-01-26 HKT
发布时间：00:00 2017-01-26 HKT

在《阿爷厨房》中厨艺技惊四座的李家鼎(鼎爷)人气爆灯，连TVB喺大年初二J2台播出嘅贺年特辑亦揾鼎爷示范几道传统贺年菜，在场嘉宾Super Girls(SG)、陈诗欣都赞口不绝，仲封埋鼎爷做偶像。71岁鼎爷强调就算俾女围都无动于衷，但最终被靓女追捧到笑晒口把持唔住，仲主动同SG成员吴嘉熙（Cheronna）大玩《人鬼情未了》齐齐揸镬铲兼揽住影相，搞到全场哗哗声，拍烂手掌。
鼎爷当晚煮咗芝麻鸡、红烧素翅、锦卤云吞及捞起等(用海蜇头代替生鱼片)，由切料到斩鸡，煎炒煮炸由他一手包办，他更自备磨刀石去磨刀，镜头以外鼎爷不时爆粗，但十分认真兼落力。做捞起时边切嘢边爆粗咿咿哦哦：「捞唔起就XXX了！」仲大大声提示工作人员：「滚油行开！」
又爱又惊
对于鼎爷恶形恶相，SG又爱又惊。Cheronna话：「第一次同佢接触，好似见偶像咁，佢好Man好有霸气，煮食又叻，好吸引呀。因为我懒，所以要跟鼎爷学功夫保护自己！」队长Aka指鼎爷完全表现咗铁汉柔情一面，好有安全感：「觉得佢好细心好温柔。」Yanny却细细声说：「但我惊呀，唔敢乱讲嘢。」而Jessica就话：「其实佢个样有啲恶，但讲解煮食步骤好详细。」Heidi则说：「希望跟鼎爷学到一手好厨艺日后煮畀老公食。」
问到71岁李家鼎被女围有乜感觉？他哈哈大笑说：「我生不逢时呀，其实我后生都好多女围，但自己从来冇追女，我唔识追女仔同揾钱，可能自己够直得女友欢心，对住女仔扮晒绅士太假，我做唔到。」鼎爷仲话唔搞「爷孙恋」，「父女恋」：「虽然有心有力，但冇可能，有阵时都要顾埋对方感受，第三者睇落去好肉酸。」

采访：方骞平