超儀蝦頭素顏拍劇監製爆《再戰明天》踩界劇情

頭條日報-娛樂

更新時間：18:43 2015-06-19 HKT
發佈時間：00:00 2014-10-03 HKT

       由林志華監製、外援關皓月做編審，吳啟華、徐子珊及何超儀等主演的TVB新劇《再戰明天》，將於下周一晚九時半播出，是第一部可以深入監獄作實景拍攝的劇集。林監製透露，劇中會講到懲教署人員王浩信愛上釋囚何超儀，囚犯蝦頭暗戀懲教署人員徐子珊不遂自殺，徐子珊跟吳啟華相距18年的忘年戀等。林志華更大讚何超儀、蝦頭為配合女囚犯角色唔化妝，只是束條馬尾出鏡夠晒專業。採訪：方騫平
      過往TVB劇被人狂鬧製作求其，外景來來去去嗰幾處，今次《再戰明天》就可以深入赤柱監獄及羅湖懲教所取實景，監製相信有助增加戲味，「演員入到去嚴肅嘅外景場地都會特別投入。」另外為了真實性，拍攝前做了大量資料搜集，他說：「所有事要貼近真實同合情合理，如演員穿嘅制服同道具等都要近似真實，飾演女囚犯嘅何超儀同蝦頭都要素顏上陣，只可以用橡筋束馬尾。同時，監犯係要用踎廁，有場戲超儀會喺踎廁拍攝，14年冇拍電視劇嘅佢接戲前都擔心過監獄環境會好臭，但入到去又接受得到，夠專業。」過往子珊着六吋高踭鞋追賊，槍林彈雨不死狂人等瘋狂場面，相信呢個劇唔會再出現。
      激讚徐子珊
      至於另一位女主角徐子珊，林監製坦言子珊曾拒演紀律部隊，經講解後知道跟以往完全不同才轉軚。他指子珊拍戲期間跟他保持溝通，演出層次就更分明：「雖然佢嘅角色冇超儀咁坎坷咁出位，但就有好多內心戲發揮，如愛上湊大她嘅Uncle吳啟華，主動表白卻被欲拒還迎，女囚犯蝦頭暗戀她而搞到自殺身亡，喺事業同愛情兩失意時子珊情緒會好崩潰，他大讚子珊掌握得好好，「佢有場戲要向超儀自爆坎坷身世，要講長達8頁紙嘅對白。」他形容呢場戲是子珊向影后何超儀挑機的戲，至於能否挑戰視后？林志華笑說：「咁要好睇機制同時機，呢個劇嘅佢發揮係超水準，絕對有資格問鼎視后！」