PJ嘴對嘴｜泰國曼谷豪住玩行程 入住全球第二酒店 私人露台坐擁湄公河景
發佈時間：09:00 2026-10-28 HKT
結婚周年，同大家分享曼谷六日五夜之旅。設計行程呢啲粗重功夫當然係由老婆負責⋯⋯性格偏Chur的我，編了個完全唔嘥時間的豪住豪玩行程。
Ms. J：行程滿滿 浪漫滿屋
今次下榻了兩間酒店，2026年全球排名第二酒店——Capella服務好到加零一，酒店人流唔多，啱晒過二人世界。酒店房坐擁湄公河景色，每間房都有私人露台。房價每晚約$7,000，間中會推出Stay 2 Free 1 Night，見到的話真係唔好錯過呀！
Ritz Carlton Bangkok位於Lumphini Park對面，無邊際泳池係一大賣點，房間設備亦係頂級，有Dyson風筒同Frette浴袍。要特別一讚Ritz Club Lounge，服務一流，由朝到晚都有免費食物及飲品供應，每晚房價約$2,800起。
穿泰服影靚相已成指定動作，潔癖的Mr. P通常唔肯着租借衣服，但話晒慶祝結婚周年，佢先唔好意思拒絕……影完相返酒店沖涼，再打扮一番，啟程去靚景天台餐廳Le Du Kaan睇日落同食飯。
行程內加插了兩個下午茶。純白唯美Author's Lounge位於文華東方酒店內，過百年歷史的白色歐陸式建築搭古典樓梯，下午茶以書本形式呈上。
Dior Gold House走金色奢華路線，網上訂位記住要揀Glass House位置，影相會靚好多。
Mr. P：瘋狂打卡任務完成
結婚15周年紀念之旅，對我嚟講非常簡單；行程不用問，只須全力配合最高管理層的決定便可！基本上，這趟打卡旅行，無論酒店設施抑或環境，都係靚到暈，絕冇冷場；冇冷場意思係我冇停過被召喚拍片影相……說好的放鬆同叉電呢？
晨早起身，早咗來到酒店，未有早餐食就要去Set頭化妝揀泰服。喺烈日下影相，全身由內到外都濕透。一定要請攝影師，唔好慳呢筆錢，因為從此相片質素、主角影得高矮肥瘦唔再關你事，兄弟們，此刻無價！
Le Du Kaan日落OK靚，不過坐指定卡位最低消費每位$1,300！好彩阿J英明一口拒絕；唔好以為有靚景大晒先得㗎，啲食物真係好普通，名廚加持都搞唔掂……
Dior Gold House不設最低消費，齋叫飲品就畀你舒舒服服慢慢影相，Dior高明呀，先引你嚟然後大包細包走出門口……人出豉油你出雞，大概就是這個意思吧。縱使阿J之後安排了三個鐘的按摩給我，我叫按摩師唔需要落精油，落止血散吧！
----------
PJ Moments——以夫妻二人視覺去分享美食及旅遊經歷
